Cawod

Syllu tua'r nen,
a chanfod y düwch
yn ddiwahaniaeth,
ddiedifar
wlyb;
er cyrraedd cysgod,
teimlo
ias ei ddagrau'n
rhaeadru
ar wydr y galon, fel drych;
mentro eto,
ac er pob gofal,
gwlychu'r traed
ym mhyllau dadrith.

Nid felly
mo'r hafau
na hawliant
benawdau breision
trychineb
ar wefan atgofion,
pan fyddai'r awyr las
yn cael sgil
ar echel ôl y beic,
a phicnics
brechdanau'r twyni'n
rhoi blas y môr
ar dafod;
y tes
yn gynnes felys,
fel dracht ola'r
botel bop,
a throchfa'r don gyntaf
yn unig
yn tynnu cryndod,
am ennyd,
cyn dod i arfer
â'i hanwes.

Wedi'r peidio,
a'r cymylau'n cylchu
drachefn,
daw'r haul
i chwarae mig,
cyn croesi'n betrus
enfys
yr eiliadau coll,
a hel adre'i
belydrau o ledrith.