Mae'r gerdd, yn ôl Hywel, yn trafod "cyhoeddiadau Gordon Brown yr wythnos yma - yn benodol lle dwedodd e 'terrorism could hit us anywhere at anytime.' Yn fy marn i mae'r llywodraeth yma yn trio cadw'r wlad mewn awyrgylch o ofn parhaus er mwyn ein hatal rhag meddwl am bethau eraill ac i gwestiynu materion eraill heblaw terfysgaeth."

Ofnau

Pan fo holl rym tywyllwch dros y byd,
a rhyddid wedi'i fygwth ar bob tu,
pan fo cysgodion ar y ffyrdd i gyd
a phob un cornel stryd yn gysgod du,
pan nad oes dim ond dychryn ar y sgrîn
a dim ond nos yr ochr draw i'r llen,
pan fo pob ffrind yn sinistr a blin
a'r rhai mewn grym yn gweld y byd ar ben,
diffoddwch y teledu am y tro,
agorwch lenni'r lolfa led y pen,
cofleidiwch yr anwybod, ewch ag o
tu allan ar y stryd fel cyllell wen
i dorri trwy hualau'r ofnau sydd
yn cadw pawb yn saff rhag bod yn rhydd.

Hywel Griffiths