له روسي چاروکو سره به د آغلې کلنټن د خبرو ډېره برخه د ايران په اړه راټوله وي .

آغلې کلنټن به د روسيې له ولسمشر ديمتري مدويديف او د باندنيو چارو له وزير سيرګي لاوروف سره وګوري .

هيلري کلنټن تر دې وړاندې د اروپا شپږو هېوادونو ته سفر کړی و .

تمه کېږي چې هيلري کلنټن به د ايران د اټومي فعاليتونو او اټومي وسلو د خورولو پرضد د روسي چارواکو د ملاتړ خپلولو هڅه وکړي .

د تېرې يکشنبې په ورځ آغلې کلنټن ايران وګواښه که چېرې تهران خپلو اټومي وسلو سنبالولو ته دوام ورکړي، نړۍ به يې پروړاندې لاس ترزنې کښېنه ني .

خو ايران هر وخت نارې وهي چې دغه اټومي فعاليتونه يې د سوله ييزو موخو لپاره دي .

په مسکو کې د بي بي سي خبريال ريچرډ ګالبين وايي چې روسيې ته آغلې کلنټن داسې مهال سفر کړی، چې په دې وروستيو کې د روسيې او د امريکا د متحدو ايالتونو ترمنځ اړيکي خړپړ شوي دي .

خو ولسمشر اوباما د خپل واک په لومړيو کې د روسيې او امريکا ترمنځ د اړيکو ښه کولو غوښتنه کړې وه، چې په دې موخه يې په تېر جولای مياشتې کې له خپل روسي سيال سره ليده کاته هم درلودل .

امريکايي چارواکي وايي چې د اوباما اداره له روسيې نه غواړي چې د ملګرو ملتونو د امني شورا لخوا پر ايران د نيو بنديزونو د ملاتړو له ډلې سره يوځای شي او يا لږترلږه د بنديزونو د لګولو مخالفت ونه کړي .

ملګرو ملتونو ګواښ کړی و که چېرې ايران د روان کال تر پايه د يورانيمو د بډايولو پروسه ونه دروي، نو نوي اقتصادي بنديزونه به پرې ولګوي .

روسيه د ملګرو ملتونو په امنيت شورا کې دايمي غړيتوب لري .