سرمشريزه په پای کې د نړيوال اقتصاد د رغولو په موخه د شپږو ټکو پر يوې پرېکړې سره سلا شول .

ولسشمر بوش اوسنۍ سرمشريزه ډېره بريالۍ وبلله .

د شلو بډايه هېوادونو دغه سرمشريزه، چې د نړۍ د اوو لويو صنعتي هېوادونو په ګډون روسيې، چين، هند او برازيل هم په کې برخه اخيستې، دغه شل بډايه هېوادونه د نړيوال اقتصاد 85 سلنه جوړوي .

د واشنګټن دغه سرمشريزه د نړيوال اقتصادي بحران د بيارغونې په موخه پر شپږو ټکو سره سلا شول، چې مهم يې په لاندې ډول دي:

د نړيوال وجهي صندوق او نړيوال بانک په څېر په نړيوالو مالي موسسو کې بيارغاونه .

د ٢٠٠٨ په پاى کې دا پرېکړه کول، چې نړيواله ازاده سوداگري به پيلېږي.

په نړيوالو مالي بازارونو کې د شفافيت څېړنه .

په له خطره ډکو چارو کې د بانکونو او مالي موسسو نه گډون کول .

په هر هېواد کې د مالي سيالۍ د نظام غښتلتيا .

سرمشريزې پرېکړه وکړه، چې د ٢٠٠٩ کال د مارچ مياشتې له ٣١ وړاندې بايد د مالي بازارونو کنټرول ښه کړاى شي، او د ٢٠٠٩ په اپريل کې د يوې مياشتې د لاسته راوړنو د څېړنې په موخه بله سرمشريزه راوبلل شي .

	د شلو بډايه هېوادونو دغه سرمشريزه، چې د نړۍ د اوو لويو صنعتي هېوادونو په ګډون روسيې، چين، هند او برازيل هم په کې برخه اخيستې، دغه شل بډايه هېوادونه د نړيوال اقتصاد 85 سلنه جوړوي .

د فرانسې ولسمشر نيکولا ساغکوزي غوښتنه وکړه، چې راتلونکې سرمشريزه دې په لندن کې جوړه شي، خو په اړه يې سرمشريزې کومه رسمي پرېکړه ونه کړه .

دوى پر دې هم سلا شول، چې هر هېواد حق لري د خپلو اقتصادي ظروفو په رڼا کې په خپلو مالي سياستونو پوره کنټرول ولري، لکه د ونډو د بازار گټه .

د سرمشريزې پايلو ته هرکلى

د امريکا نوي ټاکل شوي ولسمشر بارک اوباما په خپلو څرگندونو کې د سرمشريزې د پرېکړې په اړه وويل دى هم د نړيوال اقتصادي کړکېچ د بيارغونې پلوى دى .

نوموړي په دغه سرمشريزه کې ونډه وانخيسته، خو په نيابت کې د امريکا د بهرنيو چارو پخوانۍ وزيره مادلين اولبرايټ او د کانگرېس پخواني غړي جين ليش برخه اخيستې وه .

دغو دواړو استازو د سرمشريزې له گډونوالو سره جلا ناستې لرلې، چې په ترڅ کې يې وويل اوباما د شلو بډايه هېوادونو له گډو هڅو سره ملگرى دى .

د مکسيک ولسمشر فيليپ کالديرون له نړيوالو مالي ټولنو غوښتنه وکړه، چې د بې وزله هېوادونو د اقتصاد په پورته کولو کې دې فعاله او اغېزناکه ونډه واخلي .

بل خوا ولسمشر بوش وويل چې د سرمشريزې پايلې تر اټکل هم ور اخوا بريالۍ وې، ده وويل چې د نړيوال اقتصادي بحران د لا ښه شفافيت رامنځه کولو لپاره ډېرو هلو ځلو ته اړتيا ده .

د روسيې ولسمشر ديمتري مدويديف وويل د دويمې نړيوالې جگړې وړاندې وضعه شوى نړيوال مالي نظام اوسمهال چندانې مناسب نه دى .

مدويديف زياته کړه بايد د اقتصاد رغولو لپاره شفافې، عادلې، فعالې او قانوني موسسې جوړې کړاى شي .

د برازيل ولسمشر لولا دي سيلفا هم د سرمشريزې پايلې وستايلې او د خپل هېواد د اقتصاد د رغولو لپاره يې گټورې وبللې .

دي سيلفا وويل تر دې وړاندې يې داسې سوچ نه کاوۀ، چې نړيوال بډايه هېوادونه دې د نړيوال اقتصاد په رغولو کې دا ډول رول ولوبوي .

د مکسيک ولسمشر فيليپ کالديرون له نړيوالو مالي ټولنو غوښتنه وکړه، چې د بې وزله هېوادونو د اقتصاد په پورته کولو کې دې فعاله او اغېزناکه ونډه واخلي .