د تېرو لسو کلونو په اوږدو کې دا لومړى ځل دى چې موگابې او چانگيراى يو له بل سره مخامخ خبرې کوي .

د پرېکړې موخه په دغه هېواد کې روان تاوتريخوالي ته د پاى ټکي اېښودلو په مانا ده .

د دغې پرېکړې پربنسټ، به دوه اوونۍ وروسته د واک د وېشلو په اړه خبرې اترې پاى ته ورسېږي .

د دغو خبرو اترو ډېر تمرکز به په دغه هېواد کې د امنيت د ټينگولو، د سياسي او اقتصادي چارو په پياوړي کولو راڅرخېږي .

همدارنگه، د خبرو اترو موخه به د نوي دولت د لومړيتوبونو په پام کې نيول هم وي .

د لاسليک شوې پرېکړې پر اساس به دواړه غاړې تر ډېره بريده په دې هڅه کې وي چې روان کړکېچ پاى ته ورسوي .

لس کاله وروسته ليده کاته

دغه خبرې اترې د زيمبابوې د پلازمېنې هراري په هتلي کې ترسره شوې دي، چې په اوږدو کې يې رابرټ موگابې او مورگان چانگيراى په تېرو لسو کلونو کې د لومړي ځل لپاره سره يو ځاى شول .

	موگابې وايي ښه به دا وې چې د امريکا او اروپا له لاسوهنې پرته د خپل هېواد روان کړکېچ ته د پاى ټکى کېږدو .

ښاغلي چانگيراى له دواړو مخالفو ښکېلو ډلو وغوښتل چې د دغو سياسي خبرو اترو لپاره له يو بل سره مرسته وکړي .

خو ښاغلي موگابې بيا د سوېلي افريقا د ولسمشر تابوامبکي د منځگړيتوب د درناوي په موخه ويلي چې د زيمبابوې ولس د امريکا او اروپايي اتحاديې له لاسوهنې پرته د خپل هېواد د روان کړکېچ حل لاره غواړي .