سنجوى ماجومدر په نوي ډيلي کې د بي بي سي خبريال

	د رپوټونو ترمخه، په دغه ځانمرگي بريد کې ٤٠ کسان وژل شوي دي .

د تېرې دوشنبې په ورځ په کابل کې د هندوستان سفارت دروازې ته څېرمه ځانمرگى بريد وشو چې شاوخوا ٢٠٠ کسانو ته پکې مرگ ژوبله واوښته .

په دغه بريد کې د هند د سفارت پنځه کارکوونکي ووژل شول .

د هند د بهرنيو چارو وزير ' پراناب موخرجي' په افغانستان کې د هند پر سفارت ځانمرگى بريد په سختو ټکو وغاندۀ .

د بهرنيو چارو وزير په خپلو لنډو څرگندونو کې دغه بريد يو ترهگريز کار او ناځوانمردانه چاره وبلله .

ده وويل په بريد کې د هند يو پوځي او يو ديپلومات وژل شوي دي .

همدارنگه په دغه ځانمرگي بريد کې د هند سفارت دوه هندي ساتوکي او د سفارت يو افغان کارکوونکى وژل شوي دي .

د هند د لوړپوړو چارواکو په نوي ډيلي کې يوه بېړنۍ ناسته کړې او د دغه هېواد د بهرنيو چارو وزارت يو لوړ پوړى پلاوى يې په کابل کې پر خپل سفارت د ځانمرگي بريد د ارزونې په موخه افغانستان ته استولى دى .

همداراز د هند د دفاع وزارت هندوستان ته د وژل شويو هندي وگړيو د وړلو لپاره کابل يوه الوتکه لېږلې ده .

هند له افغانستان سره نژدي اړيکي لري او د افغانستان په ځينو ستراتيژيکو او بېخ بناوو په بيا رغاونه کې يې پانگونه کړې ده .

که څه هم په دې وروستيو کلونو کې په افغانستان کې يو شمېر هندي کارکوونکي وژل شوي دي، خو د تېرې دوشنبې په ورځ په کابل کې د هند پر سفارت دغه لومړۍ ځانمرگى بريد وو چې شاوخوا ٢٠٠ کسانو ته پکې مرگ ژوبله واوښته .

د هندوستان د بهرنيو چارو وزير ويلي چې دا ډول بريدونه به د افغانستان له خلکو او دولت سره د هند شوې ژمنې ټکنۍ نه کړي .