د مشرانو جرگې له ناستې وړاندې جنرال پټريوس د هيلري کلينټن لاس ښوروي .

خو دا يې نه ده څرگنده کړې چې له عراقه به د امريکايي پوځيانو ويستل څه مهال پيل او په څه ډول وي .

دغه څرگندونې اوباما او کلينټن د امريکا د مشرانو د جرگې په يوۀ ناسته کې په عراق کې د امريکايي ځواکونو د قومندان ډيويډ پټريوس او امريکايي سفير ايان کروکر د راپور وړاندې کولو پرمهال کولې .

ښاغلي اوباما وويل چې د امريکا متحد ايالتونه بايد له عراقه د خپلو پوځيانو د ويستلو مهالوېش وټاکي، څو په دې هېواد کې عراقي چارواکي دې ته اړکړاى شي چې د سولې او ټيکاو په برخه کې خپلې هلې ځلې چټکې کړي .

همدارنگه اومابا په عراق کې د سولې او ټيکاو راوستلو په برخه کې له ايران سره د خبرو اترو د پيلولو غوښتنه هم وکړه .

ده وويل: '' د (عراق ولسمشر) المالکي د خپل هېواد او ايران ترمنځ طبيعي اړيکي ساتلى شي، نو په عراق کې د سولې او ټيکاو راوستلو په موخه ولې له ايران سره خبرې اترې نه کوو.''

بل پلو سناتوره هيلري کلينټن د مشرانو جرگې په ناسته کې وويل چې اوس دا وخت رارسېدلى چې له عراق نه دې امريکايي پوځيان وويستل شي .

	اوباما وايي فکر نه کوم چې د عراق او ايران له جوړجاړي پرته دې موږ په عراق کې د سولې په راوستو کې بريالي شو.

خو جمهوريت غوښتونکي کانديد سناتور جان ماکين بيا غونډې ته وويل چې دده په اند اوس له عراق څخه د امريکايي پوځيانو د ويستلو مناسب وخت نه دى، که چېرې موږ خپل ځواکونه وباسو ښايي چې له ناکامۍ سره مخامخ شو او جگړې ته به بيا له سره اړتيا پيدا شي .

ښاغلي ماکين وويل: ''که چېرې موږ له عراق نه خپل ځواکونه وباسو، بيا زموږ مرستندوى عربي هېوادونه، ملگري ملتونه او په خپله عراقيان هم ملاتړ ونه کړي .''