BBC navigation

مصر: ۶۸۳ کسان په اعدام محکوم شول

د خپريدو وخت: 11:16 گرینویچ - دوشنبه 28 اپریل 2014 - 08 غویی 1393

خبریالان وايي، د تورنو کسانو ځینې ښځینه خپلوانې د محکمې حکم له صادرولو سره بې سده شوې.

مصر کې وکیلان وايي، یوه قاضي په یوې ډله ییزې محاکمې کې د اخوان المسلمین مشر محمد بدیع په ګډون ۶۸۳ کسان په اعدام محکوم کړل.

ښاغلی بدیع او ۶۸۲ کسان د لرې شوي ولسمشر محمد مرسي له پلویانو څخه و، چې د پولیسو پر یوې اډې د برید په تور نیول شوی وو.

د مارچ په میاشت کې هم ۵۲۹ کسان په همدې تور د مرګ په سزا محکوم شوی وو، چې د ۴۹۲ کسانو حکم یې لغو شو، او ډېر یې په عمري بند محکم شول.

هغه برید چې دغه ډله پرې تورنه شوې، د مصر په سوېل کې د کب په میاشت کې هغه مهال پېښ شو چې امنیتي ځواکونه د ښاغلی مرسي له دو ډلو اعتراض کوونکو پلویانو سره په نښته واوښتل.

پلویانو یې واک ته د ښاغلي مرسي ګرځیدل غوښتل.

د تورونو څېړلو او په چټکتیا سره د حکمونو صادرولو بهیر د ملګرو ملتونو او د بشري حقونو له نیوکو سره مخامخ شوی.

د بشري حقونو څارونکو د رپورټونو پر بنسټ هرې محکمې یوازې څو ساعته وخت ونیو او د تورنو کسانو مدافع وکیلانو ته د دفاع وخت ورنه کړای شو.

خبریالان وايي، د تورنو کسانو ځینې ښځینه خپلوانې د محکمې حکم له صادرولو سره بې سده شوې.

د تېر جون میاشت کې چې ښاغلی مرسي له واکه لرې شو د اخوان المسلمین له پلویانو سره ډېر سخت چلند کېږي.

د دې ډلې زرګونه غړي نیول شوي او سلګونه کسان یې له امنیتي مامورینو سره په نښتو کې وژل شوي.

موقت حکومت د اخوان المسلمین ډله چې د مصر پخواني ولسمشر محمد مرسي له ملاتړه برخمنه وه تروریستي ډله ګڼي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .