ناروې په تهران کې د امنيتي اندېښنو له وېرې خپل سفارت وتاړه.
د پلوماتيکي سرچينې وايي برتانيا وروسته له هغه له ايران نه خپل دپلوماتان باسي چې د سې شنبې پر ورځ يې په تهران کې پر سفارت بريد وشو.
د بهرنيو چارو وزارت وايي د سفارت ځينې کارکوونکي د خپل ځان د خونديتوب لپاره له تهرانه نه وځي، خو دا لا نه ده تاييد شوې چې آيا ټول دپلوماتان به وېستل کېږي.
ناروې وايي د امنيتي اندېښنو له امله يې په تهران کې خپل سفارت تړلی دی.
د برتانيا پر سفارت له هغه وروسته بريد وشو چې دغه هېواد د اتومي پروګرام په اړه پر ايران بنديزونه وضع کړل.
دا د دې لامل شو چې ايران له برتانيا سره خپلې دپلوماتيکي اړېکې سړې کړي.
په سلګونو اعتراض کوونکي چې د ايران حکومت يې محصلين بولي د سې شنبې پر ورځ په تهران کې د برتانيا د سفارت په ودانۍ باندې ورغلل او د برتانيا بېرغ او يوه موتر ته يې اور ورته کړ.
دې پېښې د ۱۹۷۹ کال هغه پېښه بيا د خلکو په ذهنونو کې تازه کړه چې ايراني زده کوونکو د امريکا پر سفارت چپاو وکړ.
په دغه بريد کې ايران د امريکا له ۵۰ ډېر دپلوماتان د ۴۰۰ ورځو لپاره له ځانه سره ساتلي وو، او له هماغه راهيسې د دواړو هېوادونو اړېکې بې خونده دي.
د برتانيې حکومت خبرداری ورکړی چې ايران به د دې کار په مقابل کې له جدي پايلو سره مخامخ شي، دا چې دا پایلې به څه وي په اړه يې زیاته روښانتيا نه شته، خو برتانيا غواړي د اروپايي ټولنې په ملاتړ عمل وکړي.
په ۱۹۹۷ کال کې د اروپايي ټولنې ټولو غړو هېوادونو وروسته له هغه د نهو مياشتو لپاره له ايران نه خپل سفيران ووېستل چې د ايران د څارګرې ادارې اېجنټان په جرمني کې د څلورو کردانو په قتل پړه وبلل شول.
د چارشنبې په ورځ په يوه وینا پاڼه کې د برتانيا د بهرنيو چارو وزارت ويلي چې لومړي وزير ډېوېډ کېمرون او د بهرنيو چارو وزير وېليم هېګ دا روښانه کړې چې د خپلو کارکوونکو او د هغوی د کورنيو امنيت ورته سملاسي لومړيتوب لري.
د برتانيا لومړي وزير ډېوېډ کېمرون خبرداری ورکړی چې د دغه بريد پايلې به ډېرې جدي وي، په داسې حال کې چې د امريکا متحده ايالتونو، اروپايي ټولنې او د ملګرو ملتونو امنيت شوری دغه بريد غندلی دی.
د ايران په حکومتي تلوېزيون د دغه هېواد د پارلمان مشر علي لارېجاني د ملګرو ملتونو د امنيت شوری د غندنې پرېکړه په بېړه بللې ده.
~RS~a~RS~pashto~RS~q~RS~~RS~z~RS~49~RS~){kind=small}
