د حج او اوقافو وزارت د معلوماتو له مخې سږ کال به شاوخوا دېرش زره افغانان حج وکړي .

وزارت وايي سعودي ته د تلونکو شاوخوا دېرش زره حاجيانو له ډلې يې اووه ويشت زره وار له مخې رسول شوي او پاتې درې زره نور به يې سبا ولېږدول شي .

ددغه وزارت مرستيال وزير شفيق صميم بي بي سي ته وويل د دوى د مهالوېش له مخې به د پنجشنبې په ورځ سعودي ته د تلونکو افغانانو وروستۍ رسمي الوتنه وي.

ښاغلي صميم وويل د تېرو کلونو خلاف يې سږ کال افغان حاجيانو ته د استوگنځايونو، روغتيايي او يو شمېر نورې پام وړ اسانتياوې برابرې کړې دي.

خو له دې هر څه سره سره هغه د يو شمېر ترافيکي پېښو او طبيعي ناروغيو له امله،تراوسه د اوو افغانانو د مړېنې او يو شمېر نورو د ژوبل کېدو خبره هم وکړه.

د ښاغلي صميم په وينا په طبيعي پېښو کې ډېرى مړه شوي هغه افغانان دي چې عمرونه يې له پنځوسو پورته ول.

د افغانستان د حج او اوقافو وزارت، سږ کال وار له مخه د دا ډول طبيعي پېښو او يو شمېر نورو نارغيو د مخنيوي په موخه له پاخه عمر لرونکو افغانانو غوښتي و چې حج ته ولاړ نه شي.