هميم جلالزی له کابله

د پکتيکا د والي وياند حميدالله ژواک وايي ناټو او افغان ځواکونو په ګډه د يادې شوې ولسوالۍ په رباط سيمه کې د طالبانو پر ضد عمليات کړي او په پايله کې يې ديوه سيمه ييز قوماندان په ګډون اته طالب جنګيالي وژلي دي .

د والي وياند وويل چې له طالبانو څخه يې يو موټر ، وسلې او مهمات هم نيولي دي .

خو طالبانو تر اوسه په دې اړه څه نه دي ويلي .

په نورستان ولايت کې بيا د افغان او ناټو ځواکونو د ګډو عملياتو په پايله کې د يو طالب قوماندان په ګډون شپږ طالبان وژل شوي دي .

چارواکي وايي عمليات ددغه ولايت په غرنۍ ولسوالۍ نوره ګرام کې له هغه وروسته وشول چې وسلوالو دغلته د ناټو ځواکونو پر اډو بريدونه وکړل .

د نورستان د ګاونډي ولايت کونړ چارواکي بيا وايي چې ناټو ځواکونو د دغه ولايت په ماڼوګي ولسوالۍ په يوه بريد کې درې ماين خښوونکي وژلي دي .

په ختيځو ولايتونو کې د ناټو د رسنيو دفتر هم دبريد خبر ورکوي خو وايي د وژل شويو د شمېرې په اړه معلومات نه لري .

ددغو پېښو په اړه هم طالبانو خپل نظر نه دی څرګند کړی .

خو په زابل ولايت کې د ولسي خلکو پر موټر د سړک غاړې ماين چاودنه شوې چې په پايله کې يې درې ولسي وګړي وژل شوي او همدومره نور ټپيان دي .

د لوېديز ولايت هرا ت د ګلران ولسوالۍ په يوه روغتيايي کلينک کې د چاودنې له امله يو تن وژل شو ی او دوه نور ټپيان دي .

د هرات د عامې روغتيا رييس غلام سعيد راشد وايي چاودېدونکي توکي په يوه بخارۍ کې ځای پر ځای شوی و.

د نوموړي په وينا وژل شوی کس د يوه ناروغ له خپلوانو څخه دی او ټپيان د کلينک کارکونکي دي .

پوليس وايي د پېښی عاملين تراوسه نه دي پېژندل شوي او په اړه يي پلټنې روانې دي.