په بريد کې د دورو امريکايي او درېيو نورو افغان پوځيانو د ټپي کېدو خبر ورکړل شوی .

بريد نن سهار مهال د ښار په ختيځه څنډه د کابل جلال آباد پر لاره د امريکايي ځواکونو فونېکس اډې ته نژدې وشوى .

د ناتو ځواکونو يوه پوځي چارواکي کيون بيل ويلي چاودنه د فونيک پوځي اډې ته څېرمه شوې .

د کابل امنيې قوماندانۍ د جنايي جرمونو پروړاندې د مبارزې مشر سيد زاده بي بي سي ته وويل په بريد کې څلور عام افغانان او د ايساف 'څلور' سرتېري ټپيان شوي دي .

نوموړی وايي بريد د يوه کرولا ډوله ګاډي په مټ شوی او د بهرنيو ځواکونو له يوه لنډکروزر سره جنګول شوی دی .

سيد زاده زياتوي که څه هم دوی ته د بهرنيو ځواکونو د تلفاتو په اړه دقيق معلومات نشته، خو په سيمه کې د هغوی يو ګاډي له منځه تللی دی .

بل خوا بي بي سي ته په کابل کې مېشتو ايساف ځواکونو د يوې خبرپاڼې په رالېږلو سره ويلي چې په بريد کې ټپي شوي افغانان د دوی ولسي قرارداديان ول او د دوی هېڅ کوم عسکر پکې نه دی وژل شوی .

ويناپاڼه زياتوي په چاودنه کې د ناټو د ايساف ځواکونو نهه سرتېري او لس افغان قرارداديان ټپيان شوي دي .

د ناټو په دې اډې کې زياتره امريکايي پوځيان مېشت ول، چې افغان ځواکونو ته پوځي روزنه ورکوي .

طالبانو د بريد مسؤوليت پرغاړه اخيستى او ادعا يې کړې چې په کې يې د بهرنيو ځواکونو څلور ټانگونه او گڼ شمېر سرتېري يې له منځه وړي دي .

د دغې ډلې يوه تن وياند ذبيح الله مجاهد بي بي سي ته وويل چاودنه د دوی د يوه ملګري لخوا شوې ده .

نوموړي په بريد کې د بهرنيو ځواکونو د څلورو ټاکنو د ويجاړولو او د کابو شلو بهرنيو عسکرو د وژل کېدو ادعا وکړه ، خو کومې رسمي سرچينې دا ادعا تراوسه نه ده تاييد کړې .