داود جنبش له لندنه

	د امنيت شورا په ازاد بحث کې د ملګرو ملتونو د لوړ پوړو مامورينو دګډون موخه په وسله والو شخړو کې د ولسي خونديتوب لپاره د دغه سازمان د ونډې ارزول و.

دوى د امنيت شورا په يوه آزاد بحث کې گډون کاوه چې په ترڅ کې يې د ولسي خونديتوب د ساتنې لپاره يو پرېکړه ليک په يوه خوله تصويب شو.

ولسي تلفاتو اوس اوس په تېره بيا د افغانستان او غزې په پېښو کې خورا جنجالي بڼه غوره کړې ده.

له نيويارک څخه د بي بي سي خبرياله باربارا پلېټ وايي چې کله ملگرو ملتونو دا موضوع لس کاله د مخه څېړله نو امنيت شورا په انگولا، سيراليون او کوسوو کې له ظلمونو او شړنو سره مخامخ وه.

لس کاله وروسته د ٦٣ هېوادونو په استازۍ ويناوالو په هغه بحث کې گډون وکړ چې په وسله والو شخړو کې د ولسي خونديتوب لپاره د ملگرو ملتو ونډه ارزوي.

هغوى د مهمو تگلارو او چوکاټونو جوړول ياد کړل، خو دغه راز يې په عمل کې د هغو په پلي کېدو کې د پرله پسې ماتو يادونه هم وکړه.

د بشري حقونو په برخه کې د ملگرو ملتونو همغږي کوونکي جان هولمز د خبرو او عمل ترمنځ واټن ته گوته ونيوله او د ولسي وگړو د خونديتوب لپاره يې د نړيوالو سوله ساتو د وړتيا د ښه والي پر ارزښت ټينگار وکړ.

د بشري حقونو مسوولې ناوي پيلاى بيا د تگلارو او عمل ترمنځ واټن مهم وباله.

هغې وويل چې ددغه واټن ورکول، د نړيوال قانون پلي کېدو ته د کلکې ژمنې او له سزا څخه د تېښتې د نه زغم غوښتنه کوي:

(( پر ټولو بايد هماغه يو ډول معيارونه پلي شي. ))

هغې د انساني ژوندانه د ساتنې په برخه کې د ماتې څلور ځايونه د بېلگې په توگه ياد کړل: د فلسطين نيول شوې سيمې، د کانگو ډيموکراتيک جمهوريت په سوډان کې د دارفور سيمه او البته چې افغانستان.