دا مهال امريکا افغانستان کې تر شپيتو زرو ډېر پوځيان لري .

نوموړي چې يوه امريکايي تلوېزيون ته غږېده، وويل چې دغه سربری پوځيان به د طالبانو د پرمختګونو مخه ونيسي ترهغه چې افغان ځواکونه روزل کېږي .

ولسمشر اوباما افغانستان کې د ناټو او امريکايي ځواکونو د مشر جنرال سټېنلي مکرېسټل پر هغه وړانديز چې څلوېښت زره نور پوځيان دې ورواستول شي، لګيا دی او غور پرې کوي . .

خو د ولسمشربارک اوباما د ملي امنيت سلاکار جېمزجونز په برلين کې وويل داسې هېڅ ضمانت نشته چې که امريکا نورځواکونه افغانستان ته واستوي نوهلته به د ناټو ستونزې حل کړي .

ښاغلي جونز په يوه مرکه کې چې د شنبې په ورځ د جرمني شپيګل مجلې خپره کړه، د دې پوښتنې په ځواب کې چې ايا دی افغانستان ته د څلوېښت زره نورو سرتېرو د لېږلو په اړه د جنرال سټېنلي مکرېسټل له غوښتنې سره موافق دی ، وويل : ((جنرالان تل د زياتو عسکرو غوښتنه کوي .

	جېمز جونز وايي اوس ترهګرې ډلې د افغانستان په ګاونډي پاکستان کې فعاليتونه تېز کړي دي.

زه بارو لرم چې موږ ستونزې يوازې په ځواکونو نه شو اوارولی . بې له شکه حداقل شمېرهم مهم دي .خوپه دې کې هم شک نشته چې هلته د ځواکونوشمېر حد اعظم ته هم نه دی رسېدلی .بيا بيا به افغانستان ته عسکر لېږو او حتی کېدای شي دوه لکه عسکر ولېږو او افغانستان به يې د پخوا په شان هضموي .))

جېمزجونز وويل تروريستي شبکې اوس د افغانستان په ګاونډي هېواد پاکستان کې د ودې په حال کې دي .

د برتانيا د وسله والو ځواکونو مشر سير جوک سټيرپ هم تېره ورځ بي بي سي ته وويل چې دا مهال القاعده په افغانستان کې فعاليت نه لري .

	سير جوک سټيرپ وويل چې پاکستان او افغانستان دواړو کې بايد پر القاعدې دباو زيات کړی شي .

دغه برتانوي چارواکي زياته کړې چې القاعده د پاکستان په يوه وړوکې سرحدي سيمې کې يوڅه خوځښت لري .

سير جوک د وژل شويو برتانوي پوځيانو د ياد لمانځنې په ورځ او په افغانستان کې د برتانوي پوځيانو د حضور پر سر د تودو را پورته شويو بحثونو په لړ کې دا خبره وکړه چې په افغانستان کې يې روان ماموريت دالقاعدې په وړاندې له پيل شوې پراخې مبارزې سره مرسته کړي .

وړاندې د برتانيا لومړي وزير ګورډن براون هم ويلي وو چې دوی ته د پاکستان او افغانستان ترمنځ له قبايلي غرونو خطر متوجه دی .