عبدالمالک عاصم له کابله

	چارواکي وايي د ولسمشرد لوړې د مراسمو دتياري تر څنګ خپله ښاغلی کرزی هم دنوې کابينې پر جوړولو بوخت دی .

دولسمشرۍ ددفتر يو چارواکی صبغت الله سنجر وايي چې په ٣ اونيو کې به دغه چاره تر سره شي:

(( موږ هيله من يو چې ژر تر ژره، د دوو – دريو اونيو په ترڅ کې وشي چې له هغه وروسته به د قانون په رڼا کې خپله کابينه وټاکي .

په کابينه باندې لا اوس کار پيل شوی ځکه کابينه جوړول ساده کار نه دی ، با اعتباره، تخصصي، ښايسته ، ځواکمنه او د خپلو خلکو پر زړه برابرې کابينې باندې بايد زياتې مشورې او فکر وشي . ))

ويل کېږي چې دنوې کابينې ټاکل به دافغان ولسمشر لپاره دا ځل اسانه نه وي .

له يوې خوا ولسمشر له يو شمېر جهادي مشرانو سره د وزارتونو او څو کيو دورکړې ژمنه کړې او له بل پلوه په وار وار ويلي چې نوی حکومت به د ملي مشارکت پر بنسټ جوړوي.

دغه راز له اداري فساده د پاکو او مسلکي وزيرانو د ټاکلو پر سر د نړيوالو پرله پسې غوښتنې هم هغه څه دي چې کرزي ته به يې له پامه غورځول ګران پرېوزي .