رحمن ملک ويلي د القاعده ځپلو لپاره مشترکې مبارزې ته اړتيا ده .

رحمن ملک ويلي د القاعدې ډلې د ځپلو لپاره، پاکستان، افغانستان او امريکا په ګډه مبارزه کوي .

ښاغلي ملک دغه څرګندونې د بي بي سي له اردو څانګې سره کړې دي .

نوموړي د پاکستان د پخواني ولسمشر پرويز مشرف هغه پخوانۍ خبره تکرار کړې، چې القاعده په پاکستان کې د سرطان ناروغۍ په څېر خپلې ريښې ټينګې کړې دي .

	پاکستان اعلان کړی، هر چا چې بيت الله مسيد او يا د اورپکو ١٨ مطلوب مشران ونيسي، دوی به پنځه ميليون ډالره انعام ورکړي .

رحمن ملک ويلي چې جنوبي وزيرستان کې د القاعده زياتره جنګيالي بهرنيان دي او د پاکستان تحريک طالبان پاکستان له ډلې سره يوځای ترهګريز فعاليتونه کوي .

د پاکستان د بهرنيو چارو وزير شاه محمود قريشي تېره ورځ کولالمپور ته د سفر پرمهال خبريالانو ته وويل په وزيرستان کې د القاعدې پرضد عمليات ښه روان دي .

رحمن ملک ويلي جنوبي وزيرستان کې يې د مسيد يا وزيرو قبايلو پر خلاف عمليات نه دي پيل کړي، بلکې هلته د طالبانو، القاعدې او اورپکو پټنځايونه دي، چې له منځه وړل يې د پاکستان مسووليت دی .

پنځه ميليون ډالره انعام !

بل خوا د پاکستان حکومت د حکيم الله مسيد د نيولو او يا د هغه د وژلو پر سر پنځه ميليونه ډالره انعام اېښی .

پاکستاني چارواکو ويلي که هر چا د طالبانو ١٨ مطلوب جګپوړي مشران ونيول او يا يې ووژل ، دوی به غټ انعام ورکړي .