د انقلاب ساتونکی ځواک په ايران کې غوره پوځي قوه بلل کېږي .

د ايران تلوېزيون ويلي چې په وژل شويو کې د انقلاب ساتونکي ځواک يو قوماندان نورعلي شوشتري او د سيستان او بلوچستان ايالت د انقلاب ساتونکي ځواک مشر جنرال محمد زاده، د ايرانشهر قوماندان او د اميرالمؤمنين پوځي مشر وژل شوي دي .

خبري سرچينو په چاودنه کې د ځينو سني او شيعه قبايلي مشرانو د وژل کېدو خبر هم ورکړی دی .

سرچينې په چاودنه کې د وژل شويو او ټپيانو شمېر تر ٦٠ تنو پورې ښودلی دی .

چاودنه له پاکستاني پولې سره نژدې د سيستان په پيشين سيمه کې داسې مهال شوې ده، چې ويل کېږي سيمه ييزو سني او شيعه قبايلي مشرانو د انقلاب ساتونکي ځواک له مشرانو سره ناستې ته د يووالي په موخه تياری نېوه .

د يادو شويو جګپوړو پوځي قوماندانانو‎ وژل کېدل ايراني پارلمان ته د وينا پرمهال د پارلمان مشر علي لاريجاني هم تاييد کړي دي .

په تېرو څو کلونو کې څو ځلې په سيستان او بلوچسان کې تاوتريخجنې پېښې شوې دي، چې عمدتاً پړه يې د ايران جندالله ډلې پرغاړه اخيستې ده .

په تېرو کابو پنځو کلونو کې د ايران په جنوب ختيځو سيمو کې جندالله خپل فعاليتونه پراخه کړي دي .

د زاهدان اميرالمؤمنين په جومات کې د چاودنې پړه هم دغې ډلې پرغاړه اخيستې وه ، چې زياتره قربانيان يې عام خلک ول .

جندالله غواړي چې په سيستان او بلوچستان کې د بلوڅ او اهل سنت قامونو د مذهبي حقونو خونديتوب په موخه خپله مبارزه جاري وساتي .

دوی وايي چې جندالله جلا غوښتونکې ډله نه ده .

خو د ايراني او پاکستاني دولتونو لخوا جندالله يوه ترهګره ډله پېژندل شوې ده .
ايران دا تور هم لګوي چې د امريکا متحده ايالتونه د دغې ډلې ملاتړ کوي .