08:11 گرينويچ 2009 ,16 جولاى
الياس وحدت
له خوسته
داکمالاتي کاروان 3 ساتونکي ووژل شول
د پكتيكا ولايت دبرمل سرحدي ولسوالۍ په مرغې سيمه كې د بهرنيو ځواكونو پراكمالاتي كاروان بريد کې پنځه افغان امنيتي ساتونکي ټپيان او درې نور وژل شوي دي .
ددغه ولايت دوالي وياند حميدالله ژواک وويل چې په له بريده وروسته د دواړو لورو تر منځ نښته پيل شوه چې دوه ساعته روانه وه .
ده زياته کړه چې په نښته کې د کاروان دساتونکو په مرګ ژوبلې سربېره ددوی دسپرلۍ درې موټرونه هم ويجاړ شوي دي .
ښاغلي ژواک د طالبانو دزيان په اړه وويل چې د دوو قوماندانانو په ګډون 21 وسلوال طالبان وژل شوي او يو شمېر نور ټپيان شوي دي .
خو وسلوال طالبان وايي چې ددوی يو ملګری ټپي شوی او وژل شوي ټول ولسي وګړي دي .
دغه راز طالبان ادعا کوي چې په دغه بريد کې يې داکمالاتي کاروان ګڼ سرتېري وژلي او 15 تنه يې ژوندي نيولي دي .
بل لوري ته د خوست د ناامنه ولسوالۍ صبريو خالبېسات ښارګوټي ته نژدې د روشن مخابراتي شركت مخابراتي ستنه په ماين الوزول شوې او وروسته سوځول شوې ده .
د صبريو ولسوال دولت قيومي وايي، چې پېښه دشپې نا وخته شوې او دا وخت دغه ستنه كار نه کوي .
د دې ترڅنګ په خوست كې د ناټو ځواکونو درسنيو دفتر وايي چې تېره شپه يې په صبريو ولسوالۍ كې دوه ماين خښوونكي له چورلکې څخه ويشتلي او وژلي دي.