د تهران په پوهنتون کې د جمعې خطبې ته د موسوي زرګونه پلويان ورغلي ول .

پوليسو د لاريون کوونکو د تيتولو لپاره له اوښکې بهوونکو گازو استفاده کړې او داسې رپوټونه هم شته چې يو شمېر کسان يې نيولي هم دي .

په نيول شويو کسانو کې د ښځو د حقونو پېژندل شوې فعاله شادي صدر هم شامله ده .

د ايران حکومتي رسنيو ددغو لاريونونو په اړه رپوټ ورنکړ، خو د دغه هيواد د پخواني ولسمشر اکبر هاشمي رفسنجاني خبرې چې په کې حکومتي چارواکي ننگول شوي، د راډيو لخوا خپرې شوې .

رفسنجاني د جمعې د لمانځه په خطبه کې ويلي چې ايراني چارواکي بايد په تېرو لاريونونو کې نيول شوي احتجاج کوونکي خوشي کړي .

نوموړي ويلي : ((لاهم زياتره ايرانيان د ټاکنو هغه پايلې نه مني، چې ولسمشر محمود احمدي نژاد په کې د دويم ځل لپاره د ايران ولسمشر وټاکل شو . او مخالف سيال ميرحسين موسوي يې پرضد لاريونونه وکړل .))

د تهران په پوهنتون کې د جمعې خطبې ته د موسوي زرګونه پلويان ورغلي ول .

موسوي د تېرې پنجشنبې په ورځ اعلان وکړ، چې د راتلونکې جمعې د خطبې پرمهال به په لومړي ځل له لاريونونو وروسته يو ځل بيا پر ايراني ولس د ټاکنو د پايلو نه منلو غږ وکړي .

عيني شاهدانو ويلي چې پوليسو د تهران پوهنتون ته ځينې تلونکې لارې بندې کړې او د موسوي پلويانو د پوهنتون په ختيځه برخه کې لاريون کاوه ا و د (يا ميرحسين موسوي ) او (سياسي بنديان خوشي کړئ) شعارونه يې ورکول .

خو ايراني چارواکو د استخباراتو د وزير په ژبه خبرداری ورکړی، چې : ((د جمعې له لمانځه نه د ناوړه ګټې اخيستو نه ډډه وکړي .))