په هلمند کې له تېرو څو ورځو راهيسې د طالبانو پرضد بهرنيو او افغان ځواکونو سخت عمليات پيل کړي دي .

بي بي سي ته د ايساف ځواکونو په يوه رالېږل شوې خبرپاڼه کې ويل شوي چې د افغانستان په ختيځ کې يې تېره ورځ يو سرتېری د وسله والو د يوه بريد په پايله کې ووژل شو.

په خبرپاڼه کې د وژل شوي سرتېري د هويت او د بريد دقيق ځای نه دی ښودل شوی .

بل خوا په هلمند کې د دوو امريکايي سرتېرو د وژل کېدو خبر ورکړل شوی دی .

دغلته پراخ پوځي عمليات ادامه لري .

ويل کيږي بهرني سرتيرې پدغو عملياتو کې د مخالفينو له جدي مقاومت سره نه دي مخامخ، بلکې د سړک د غاړې ماينونه او ځانمرگي بريدونه د دوى لپاره لوى گواښ دى، خو بهرني سرتيري په نژدې تېرو اتو کلونو کې دا مهال له زياتې مرگ ژوبلې سره مخامخ دي .

په افغانستان کې امريکايي سرتېري په تدريجي توگه ډېر شوى اوس يې شمېر ٧٠ زرو ته نژدې شوى دى .

د تېرې اوونۍ په اوږدو کې افغانستان کې اته برتانوي پوځيان ووژل شول، چې په دې سره په افغانستان کې د ټولو وژل شويو سرتېرو شمېر تر 184 اوړي .

تېره ورځ د امريکا ولسمشر بارک اوباما غانان ته د سفر په درشل کې د برتانيا له سکای تلوېزيوني چينل سره په مرکه کې ويلي وو چې افغانستان کې د اګست مياشتې ترټاکنو وروسته بايد د افغانستان په اړه پر نړيواله ستراتيژۍ له سره مرور وشي .

نوموړي ويلي وو چې ښايي انکشافي مرسته تر پوځي هغې زياته اغېزمنه وي .