د ملگرو ملتونو ټينگار دا دى چې خلک دې خپلې خوښې ته پرښودل شي .

د پاکستان پوځ د سوات درې او شاوخوا سيمو ته ورغلې لارې نن بيرته پرانيستي دي .

د دې گام موخه بېرته ستنېدو ته د هغو شاوخوا دوه ميليونه خلکو هڅول يادېږي چې د پوځ او طالبانو تر منځ د جگړو له کبله له سيمې بې ځايه شوي دي .

ځينې بې ځايه شوي خلک لا له وړاندې د خپلو حيواناتواو شتمنيو د ژغورنې لپاره بېرته ستانه شوي دي .

خو اوس د پراخې کچې د بېرته ستنېدو تکلونه دي چې دا به په سوات، ملکنډ او دير کې د ديره شوي پوځ تر څار لاندې وي .

د چارې د تنظيم مسووليت جنرال نديم احمد ته سپارل شوى .

دا هغه چارواکى دى چې د کشمير له زلزلې وروسته هم ورته مسووليت ورپه غاړه وو.

په لومړي پړاوو کې به په کمپونو کې ميشتې کورنۍ ستنېږي .

ورپسې به په ښوونځيو او نورو ځايونو کې د ديره خلکو وار وي .

د ملگرو ملتونو ټينگار دا دى چې خلک دې خپلې خوښې ته پرښودل شي .

دا ځکه چې په سيمه کې د اوبو او برېښنا سيستم ويجاړ شوى او بېرته سمبالول يې ښايي څو مياشتې واخلي .

د پاکستان د ملتان ښار په يوه کور کې چاودنې لږ تر لږه نهه کسه وژلي او په لسگونو نور يې ټپيان کړي دي.

پوليس وايي چاودېدونکي توکي ظاهرا د يوه دمذهبي عالم په کور کې ايښي وو چې ماشومانو ته يې ديني زده کړې ورکولې .
چاودنې تر لسو زياتو نورو کورونو ته هم زيان اړولى دى .

چارواکي وايي نه پوهيږي چې د چاودنې لامل څه وو .