برګمټال د روانې جولای مياشتې پر نهمه وسله والو طالبانو نيولې وه .

دغه ولسوالۍ د روانې جولاې مياشتې پر نهمه طالبانو له سختې جګړې وروسته ونيوله .

د نورستان ولايت امنيه قوماندان قسيم پيمان ويلي چې تېره شپه د افغان ملي اردو او نړيوالو ځواکونو په ګډو عملياتو کې دغه ولسوالۍ بېرته د طالبانو له ولکې وويستله .

په ختيځ زون کې د ايساف ځواکونو افغان مطبوعاتي مسوؤل سباوون هوتک بي بي سي ته وويل چې د برګمټال ولسوالي نن سهار شاوخوا پنځه بجې بېرته له طالبانو ونيول شوه .

ښاغلي سباوون وويل چې اوس ايساف قوماندانان له سيمه ييزو خلکو سره په خبرو بوخت دي، چې څرنګه طالبان سيمې ته راننوتل او څه ډول يې مخنيوی کېدای شي .

دوی وايي چې په دغو عملياتو کې چاته زيان نه دی اوښتی .

که څه هم د نورستان ځايي چارواکي د برګمټال ولسوالۍ د بېرته نيولو خبره کوي، خو په دې اړه طالبانو څه نه دي ويلي .

تېره اوونۍ د دغې ولسوالۍ د نيولو پرمهال په نښته کې لس پوليس او د چارواکو په وينا تر شلو ډېر وسله وال طالبان ووژل شول .

برګمټال ولسوالۍ په داسې حال کې بېرته د دولت لاس ته لوېږي، چې په جنوبي هلمند ولايت کې د نړيوال او افغان ځواکونو په ملګرتيا د طالبانو د ځپلو عمليات لاهم دوام لري .

دغه ولسوالي غرنۍ سيمه ده، که چېرې افغان او بهرنيو پوځيان په دايمي توګه په کې حضور ونه لري، ښايي چې بيا دا ډول ستونزې په کې رامنځ ته شي .

دغه ولسوالۍ له پاکستان سره ګډه پوله لري او سخته غرنۍ سيمه ده .

د افغانستان د ولسمشريزو ټاکنو په رانژدې کېدو سره افغان او بهرنيو ځواکونو د وسله والو پرضد عمليات تېز کړي دي .

خو طالبانو هم د خپلو بريدونو د ډېرولو خبره کړې ده .