عزيزاحمد شفيع له هلمنده

د موسى كلا ولسوال ملاعبدالسلام د دوشنبې په ورځ وويل چې نښته وروسته له هغه رامنځ ته شوه كله چې دوى د خپل وژل شوي زوى عبدالغفار جنازه چې د يكشنبې په شپه د شاكاريز په سيمه كې د ځمكني ماين د چاودنې له امله وژل شوى و خاورو ته وسپارله .

د ده په وينا، ‎د ده له زوى سره د ماين په چاودنه كې څلورپوليس هم ټپيان شوي وو او د هديرې پرسر په نښته كې شپږ تنه وسلوال طالبان او څلورتنه پوليس وژل شوي او د دې ترڅنگ څلور تنه وسلوال طالبان ټپيان شوي دي .

ملا سلام وايي چې زوى يې په شاكاريز سيمه كې د هغه سلو تنو پوليسو مشري كوله چې په دې وروستيوكې د كورنيو چارووزارت له لوري د امنيت د ټينگښت په موخه يادې سيمې ته استولي وو.

نوموړی وايي چې په موسى كلاولسوالۍ كې امنيتي حالت ښه نه دى او د ولسوالۍ په نژدې سيموكې وژنې کېږ چې لامل يې نه څرگنديږي او دوى په ولسوالۍ کې دا مهال كافي مامورين هم نه لري چې ورځنۍ اداري چارې پرمخ بوځي .

د دې نښتوپه اړه لاتر دې مهاله وسلوالو طالبانوڅه نه دي ويلي .

د موسى كلاولسوالي شاوخوا دوه كاله وړاندې د دولت او نړيوالوځواكونو له لوري د عملياتو په ترڅ كې ونيول شوه خو اوسېدونكي لا هم له امنيتي ستونزو سر ټكوي .

بل خوا تېره شپه د نادعلي ولسوالۍ په خوشحال کلي کې پر يو کور د غټى ګولۍ د لګېدو له امله د ځايي خلکو په وينا ‎ تر دېرش زياتو کسانو ته مرګ ژبله اوښتې .

دغه پيښه تېره شپه د دوو بجو پرشاوخوا رامنځته شوې، خو په هلمند کى چارواکي د دېرشو د مرګ ژوبلي خبره نه مني خو پېښه تائيدوي .

د هلمند د والي وياند داؤد احمدي بي بي سي ته وويل چى دا لا څرګنده نه ده چې دغه بريد توغندوي بريد دي که د نړيوالو ځواکونو د جنګي الوتکو له لوري ورباندې بم غورځېدلی .

نوموړي وويل چى په دغه پېښه کې څلور ولسي کسان وژل شوي او څلور ژوبل شوي چې په ژوبل شويو کې درې ماشومان هم دي .