مصطفی سالک له کابله

	سيمه ييز خلک وايي امريکايان په داسې شوبلو کې ورغلي دي چې نه پر لښتيو ايساريږي او نه پر ونو .

سربيره پر دې، د جمعې پر ورځ امريکايي سمندري ځواکونه د طالبانو د واکمنۍ د سيمو زړه ته ننوتل، او د هغوى اکمالاتي لارې يې پرې کړې، څلور زرو امريکايي او په سلگونو افغان ځواکونه د پرمختگ پر مهال د طالبانو له کمزوري مقاومت سره مخامخ شول .

د راپورونو له مخه امريکايي او افغان ځواکونه د شوبلو او جنگي لوتکو په مټ په چټکۍ سره مخ په وړاندې روان دي .

تر اوسه داسې کره راپورونه نه دي خپاره شوي چې په دغو جگړو کې وسلوالو طالبانو ته په کومه کچه مرگ ژوبله اوښتي ده، خو د يوه امريکايي سمندري سرتيري د وژل کېدو او د گڼو نورو د ټپي کېدو خبرونه خپاره شوي دي .

امريکايي ځواکونو د پنجشنبې پر مازيگر د خانشين د ولسوالۍ د نيولو خبر ورکړ خو پرون د جمعې پر ورځ امريکايي او افغان سرتېري د ناوې او گرمسير ولسواليو مرکزونو ته ځانونه ورسول .

	په دغو عملياتو کې امريکايي، افغان، برتانوي او ډنمارکي پوځيانو برخه اخيستې ده .

سيمه ييز خلک وايي امريکايان په داسې شوبلو کې ورغلي دي چې نه پر لښتيو ايساريږي او نه پر ونو .

دغه عمليات چې د خنجر په نامه نومول شوي موخه يې تر ولسمشريزو ټاکنو مخکې د هغو ولسواليو نيول او ساتل دي چې تر اوسه په کې طالبان واکمن وو .

د پولې پاکستانۍ خوا ته هم پرون امريکايانو په شمالي وزيرستان کې د مشکوکو اورپکو پر پټنځيونو د بې پيلوټه الوتکو څخه توغوندي ويشتي او تر لسو ډېر اورپکي يې وژلي دي .

همداراز دپاکستان د پوځ چارواکي وايي چې له هلمند سره پر پوله يې خپل گڼ شمېر پوځونه ځاى پر ځاى کړي دي چې طالبان له هلمنده تېښته ونه کړي .

هلمند د پاکستان له بلوچستان ايالت سره نژدې ٢٦٠ کيلومتره اوږده ګډه پوله لري .

د خنجر په نامه عمليات د ٢٠٠١ کال راهيسې تر ټولو ستر عمليات دي .