محمدحامد حليمي له کابله

	(( له 1387 کاله راهيسې تر اوسه پورې تر 5000 ډېر ډيپلومونه تراوسه وېشل شوي دي. ))

ددغه وزارت دچارواکو په وينا له دېرش کلن ځنډ وروسته په سلګونو فارغ شوي، محصلين د ډيپلومونو د ترلاسه کولو په موخه ورمات شوي دي.

د لوړو زدکړو وزارت وياند عبدالعظيم نوربخش د ډيپلومونو دوېش په اړه وويل چې تر دې مهال يې زرګونو فارغانو ته ډيپلومونه وېشلي دي .

(( له 1387 کاله راهيسې تر اوسه پورې تر 5000 ډېر ډيپلومونه تراوسه وېشل شوي دي. ))

ښاغلي نور بخش زياته کړه سره له دې چې دغه وزارت د ډيپلومونو د وېشلو چارې چټکې کړې، خو په وينا يې اوس هم په زرګونو نور داسې کسان شته چې په تېرو کلونو کې د لوړو زدکړو له موسسو فارغ شوي او تراوسه يې ډيپلومونه نه دي ترلاسه کړي.

د نوموړي په وينا د لوړو زدکړو وزارت لخوا وېشل شوي ډيپلومونه په ملي او نړيواله کچه لوړ اعتبار لري او د ويشلو لړۍ به يې په راتلونکې کې هم دوام ولري .

((اصلي او بنسټيزه موضوع چې د لوړو زدکړو وزارت پر هغې ډېر ټينګار درلود، د دغو ډيپلومونو اصلي پېژندل او د ډيپلومونو د لوړ کيفيت په پام کې لرل و.

موږ تېر کال په دې وتوانېدو چې له دېرش کلن ځنډ وروسته يو ځل بيا د ډيپلومونو وېشل پيل کړو.

نن هغه شمېر محصلين چې د ماستر او ډاکتر په کچه لوړو زدکړو ته ځي، چې د لوړو زدکړو وزارت دغه ډيپلوم ورسره وي په ملي او نړيواله کچه د اعتبار وړ دي.))

د چارواکو په وينا په دغو ډيپلومونو کې د افغانستان پر رسمي ژبو سربېره په انګريزي ژبه هم اړوند معلومات ليکل شوي دي.

اوسمهال په افغانستان له 15 ډېرې د لوړو زدکړو حکومتي موسسې شته چې د چارواکو په وينا فارغانو ته يې د دغه وزارت له خوا ډيپلوم ورکول کېږي .

تر دې وړاندې هغو کسانو ته چې د لوړو زدکړو وزارت له تحصيلي موسسو فارغېدل، د دغه وزارت لخوا د بريليک يا سرټيفيکيت په نوم سند ورکول کېده.