دغه کميسيون د ځينو کورنيو رسنيو هغه ګنګوسې بې بنسټه بللې، چې وايي ښايي ټاکنې يا بشپړې او يا په قسمي ډول وځنډېږي .

خو د کميسيون چارواکي وايي له قانون سره سم به چلند کوي چې په ځانګړو دليلونو د ټاکنو په مهالوېش کې د بدلون اټکل کوي .

د ټاکنو د خپلواک کميسيون وياند نورمحمد نور بي بي سي ته د دغه چمتووالي په اړه ويلي چې : (( ترکومه چې موږ ډا‌ډمن يو، د خلکو په ملاتړ ډېر حساب کوو او د ټاکنو لپاره موږ پوره وخت په لاس کې لرو، د هېواد امنيتي ارګانونو بېلابېلې طرحې پلی کړې او لاهم پلی کوي يې، او موږ ته يې ډاډ راکړی چې د زمري تر 29 مې پورې به د ټاکنو لپاره ښه چاپېريال رامنځ ته کړي . ))

تعويق او تعليق يانې څه ؟

ښاغلي نور د دې پوښتنې په ځواب کې چې څو ورځې د دغه کميسيون مشر عزيزالله لودين رسنيو ته ويلي وو د ټاکنو د قانون د 55 مادې له مخې، که په ځينو حالاتو او يا سيمو کې امنيتي حالات ترينګلي وي، ښايي ټاکنې له تعليق او يا تعويق سره مخامخې شي، وويل چې :

(( تاسو پوهېږۍ چې د ټاکنو 55 ماده په ښکاره توګه وايي که چېرې امنيتي حالات، لوژيستيکي، مالي او ان جوي (هوايي) شرايط برابر نه وي، د ټاکنو کميسيون واک لري، چې په هره حوزه کې ټاکنې وځنډوي او يا يې هم د تعليق په حالت کې راولي.))

نوموړي وويل کميسيون ټينګار کوي چې ټاکنې پر هماغه ټاکل شوې نېټه ( د زمري 29مه) وشي.

نورمحمد نور د (تعويق او تعليق) د وضاحت په اړه وويل چې له لومړي نه هدف ځنډول او دويم يې ځای پرځای درول په ډاګه کړ .