واشنګټن په هلمند ولايت کې 12 پوځيان ځای پرځای کړل، خو جنرال سټينلي مک کريسټل له برتانيا نور پوځيان غواړي .

د برتانيا د دفاع وزارت چارواکو ويلي داسې ښکاري چې د اوړي په رارسېدو سره وسله والو طالبانو هم خپل بريدونه تېز کړي، چې دا به له ځانه سره خونړۍ جګړې ولري .

په برتانيا کې چاپېدونکې ټيليګراف ورځپاڼې د دفاع وزارت د چارواکو له خولې کښلي چې په هلمند کې مېشت بهرني پوځيان د طالبانو او اورپکو ډلو له ټينګ مقاومت سره مخامخ دي، او دوی وړاندوېينه کوي چې ښايي حالات په راتلونکې کې تر دې هم کړکېچن شي .

د برتانيا د دفاع وزارت د يوې خبرپاڼې په حواله، په افغانستان کې د وسله والو بريدونه په سلو کې 73 ته لوړ شوي او د تېر کال په پرتله په ايتلافي ځواکونو کې د مرګ ژوبلې کچه تر 78 سلنې پورته شوې ده .

	په تېره مياشت کې هلمند کې 12 برتانوي پوځيان وژل شوي وو.

رسمي شمېرې ښيي چې د افغانستان په سويلي نارامه ولايت کې د تاوتريخوالي پېښې درې برابره لوړې شوې دي او طالبان هره ورځ په دغه ولايت کې د حکومت او بهرنيو ځواکونو پرضد 12 ځلې بريدونه کوي .

نور ځواکونه

د برتانيا يوه جګپوړي پوځي چارواکي ويلي چې طالبان اوس تر نورو سيمو په هلمند ولايت کې خپل زور ډېر ازمويي، چې د برتانيا دفاع وزارت د واشنګټن د هغې پرېکړې هرکلی کړی، چې په دغه ولايت کې به 12 زره پوځيان ځای پرځای کړي .

په تېره مياشت کې هلمند کې 12 برتانوي پوځيان وژل شوي وو، چې په دې سره له 2002 راپدېخوا په افغانستان کې د وژل شويو برتانوي پوځيانو شمېر تر 166 پورې رسېږي .

ټيليګراف زياتوي چې په افغانستان کې يې د بهرنيو ځواکونو د وژل شويو پوځيانو رسمي شمېرې د ناټو ځواکونو له پټو اسنادو ترلاسه کړې دي، چې پربنسټ يې په تېره مياشت کې د طالبانو د سړک غاړې ماينونو لسګونه امريکايي پوځيان وژلي او ټپيان کړي دي .

	په دې وروستيو کې د برتانيا لومړي وزير ګورډن براون افغانستان ته د دوه زره نورو برتانوي پوځيانو استول د برتانيا له اقتصادي وضعيت سره په ټکرکې بللي وو .

د سرچينې په وينا، په افغانستان کې د تېرو 12 مياشتو په اوږدو کې تاوتريخجنې پېښې 90 په سلو کې ډېرې شوې دي .

بل خوا د برتانيا ټايمز ورځپاڼه ليکي چې واشنګټن له برتانيا څخه افغانستان ته د نورو پوځيانو د لېږلو غوښتنه کړې ده .

ټايمز په افغانستان کې د ايتلافي ځواکونو نوي امريکايي قوماندان سټېنلي مک کريسټل د تېرې دوشنبې په ورځ ويلي وه، چې افغانستان کې د طالبانو پرضد جګړه کې د برتانيا نورو پوځيانو ته اړتيا لري .

د ويلو ده چې په دې وروستيو کې د برتانيا لومړي وزير ګورډن براون هلمند ته د 2000 نورو برتانوي پوځيانو د لېږلو طرحه رد کړه او دا پرېکړه يې د برتانيا له اوسنيو اقتصادي حالاتو سره په ټکر کې وبلله .