دا د باراک اوباما د واکمنۍ پرمهال پر وزيرستان د امريکايي بې پيلوټه الوتکې لومړی بريد دی.

دا د امريکا د نوي ولسمشر باراک اوباما په واکمنۍ کې لومړی بريد دی .

رپوټونه وايي لومړی بريد په مير علي سيمه کې د يوه قبايلي مشر پر کور شوی او اووه کسان په کې وژل شوي دي .

پاکستاني چارواکو ويلي څو ساعته وروسته دويم بريد د جنوبي وزيرستان له واڼه ښار څخه درې کيلومتره ليرې د ګنجي خېلو په سيمو کې پر يوه کور شوی او پنځه کسان په کې وژل شوي دي .

دا په داسې حال کې ده چې پاکستان ته د ناټو عمومي منشي ياپ دي هوپ شفر پاکستان ته په سفر تللی دی .

د پاکستان لومړي وزير يوسف رضا ګيلاني څو مياشتې وړاندې هيله ښوولې وه چې د امريکا نوی ولسمشر باراک اوباما به له لوړې وروسته د پاکستان پر قبايلي سيمو د بې پيلوټه الوتکو توغنديز بريدونه بندوي .

تر دې وړاندې په تېر دسمبر مياشت کې پرشمالي وزيرستان د امريکا بې پيلوټه الوتکې تر بريد وروسته ځايي طالبانو امريکا ته د جاسوسۍ په تور تر ١٥ ډېر کسان ووژل .

طالبانو ويلي چې دوی په وزيرستان کې امريکا ته د جاسوسانو شبکه کمزورې کړې ده .