کبىر حقمل له کابله

	د ټاکنو د خپلواک کميسيون چارواکي وايي چې هيله لري د نوم ليکنې په وروستي پړاو کې چې په کندهار، هلمند، نىمروز او ارزگان ولايتونو کې پيل شوى تر دريو سوو زرو خلک خپل نومونه ثبت کړي.

دا په داسې حال کې ده چې د هلمند په گډون د سوېل په څلورو نسبتا نا رامو ولايتونو کې له تېرې سه شنبې( د جنوري٢١مه) نه په ټاکنو کې د گډون لپاره نوم ليکنه پيل شوې ده.

چارواکي وايي چې دا به په افغانستان کې د ولسمشرۍ د راتلونکي کال په ټاکنو کې د گډون لپاره د نوم ليکنې وروستى پړاو وي.

وړاندې تر دې د افغانستان په دېرشو ولايتونو کې څه باندې درې ميليونو وگړو په دريو پړاوونو کې خپل نومونه ثبت کړي وو.

د ټاکنو د خپلواک کميسيون چارواکي وايي چې هيله لري د نوم ليکنې په وروستي پړاو کې چې په کندهار، هلمند، نىمروز او ارزگان ولايتونو کې پيل شوى تر دريو سوو زرو خلک خپل نومونه ثبت کړي.

د دغه کميسيون د دارلانشا مشر داود علي نجفي وايي چې تر دې مهاله په يادو شويو څلورو ولايتونو کې د نوم ليکنې لړۍ ښه پرمخ روانه ده، خو د هغه په وينا لا هم د هلمند په يو شمېر ولسواليو کې د نومونو ليکل نه دي پيل شوي.

" موږ چې کومه ستونزه په هلمند ولايت کې لرو هغه داده چې د درې څلورو ولسواليو کنټرول د دولت په لاس کې نه دى، خو د هغو سيمو خلک موږ ته راځي او غوښتنه کوي چې د نوم ليکنې ډلې ور واستوو، د ټاکنو کميسيون پر دغې غوښتنې جدي سوچ کوي."

له دې سره سره چې ويل کېږي وړاندې تر دې طالبانو په يادو شويو سيمو کې د نوم ليکنې د مخنيوي گواښ کړى و، خو د ټاکنو د کميسيون چارواکي وايي خلکو ورسره ژمنه کړې چې د نوم ليکنې د لړۍ ملاتړ به کوي.

هغوى همدارنگه وايي چې د نوم ليکنې د مرکزونو امنيت هم د پوليسو لخوا نيول شوى دى.

څو اوونۍ وړاندې داسې رپوټونه خپاره شول چې په کندهار کې د نوم ليکنې يو مرکز د طالبانو لخوا سوځول شوى و.