پاکستاني پوځ اعلان کړی و چې د اورپکو پرضد به عمليات پيلوي .

په دغو عملياتو کې له هوايي او ځمکني پوځ کار اخيستل کېږي .

په سيمه کې يو حکومتي چارواکى طارق حيات وايي دغه عمليات به د امنيت تر ډاډمنېدو پورې روان وي .

په پېښور کې يوه خبري کنفرانس ته ښاغلي حيات وويل چې تر دې مهاله په روانو عملياتو کې يو وسله وال وژل شوی دی .

سيمه ييزو خلکو د دوو ماشومانو د وژل کېدو خبره هم ور کړی دی .

ويل کېږي چې د عملياتو له امله د پېښور- تورخم لويه لاره د ترافيکو پر مخ تړل شوې ده .

تر دې وړاندې د دسمبر پر اوومه گڼ شمېر په وسلو ښه سمبال کسانو له پېښوره د باندې شاوخوا ١٠٠ هغه لارۍ وسوځولې چې په افغانستان کې يې د ناټو ځواکونو ته توکي لېږدول .

پاکستاني پوليسو ژمنه کړې وه چې د بريد کوونکو پر ضد به عمليات کوي .

څه موده وړاندې د پاکستان دغه لار د ناامنيو له امله تړلې وه .

د خيبر دره په افغانستان کې د ناټو ځواکونو د اکمالاتو لپاره تر ټولو مهمه بلل کېږي .

تر دې وړاندې د تېر نومبر په مياشت کې وسله والو د خيبر غاښي په جلا جلا ځايونو کې ١٢ بار وړونکي موټر برمته کړي ول .

عيني شاهدانو ويلي وه، چې په درېيو ګاډو کې وسلې هم وې، چې په افغانستان کې بهرنيو ځواکونو ته لېږدول کېدې.