د اسيا د کريکټ شورا د تبصره کوونکو په وينا په روانو سياليو کې افغانستان او عمان تر ټولو پياوړي دي

ماينمار د پچې په گټلو خپله منډو ته ملا وتړله خو د افغانستان د بالرانو په وړاندې ټينگ نه شول .

د دوى ټوله لوبډله په ٣٥ اوور کې يوازې په ٧٥ منډو وسوځيدله .

د افغانستان له خوا نجيب، ذبيح او کپتان افضل د مخالفې ډلې درې درې او يمين يو لوبغاړى وسوځاوه .

په ځواب کې افغانستان خپل هدف يوازې په اتم اوور کې د دوو لوبغاړو په سوځيدو ترلاسه کړ.

په تايلنډ کې ترسره کيدونکې دغه سيالۍ د دوشنبې په ورځ پيل شوې چې په لومړۍ ورځ افغان تنکي لوبغاړي له يوې په زړۀ پورې لوبې وروسته له ماتې سره مخامخ شوي و .

د اسيا د کريکټ شورا تبصره کوونکي په دې باور دي چې ښايي افغانستان او عمان د دغو سياليو پايلوبې ته هم لار ومومي ځکه چې تر نورو لوبډلو ډير تکړه ښکاري .

همدا نظر د دغو سياليو په دويمه ورځ هغه وخت ښه وځليد چې عمان له ايران سره په خپله دويمه لوبه کې خپله پياوړتيا وښوده .

عمان د سه شنبې په ورځ د څلور لوبغاړو په سوځيدو په خپلو ټاکلو ٤٠ اوورونو کې ٢٤٥ مندې وکړې او په ځواب کې يې د ايران ټوله لوبډله په ٤٣ منډو وسوځوله .

ايران خپله لومړنۍ لوبه له ماينمار څخه گټلې وه .

که افغانستان د پنجشبې په ورځ ايران ته ماتې ورکړي نو له عمان سره به د دغو سياليو نيمه پايلوبو ته لار ومومي .

په نيمه پايلوبه کې ښايي افغانستان له کوربه هيواد تايلنډ سره مخامخ شي چې خپله لومړنۍ لوبه يې له مالديف څخه گټلې وه .

د سه شنبې په ورځ په بي گروپ کې چين که څه هم د مالديف لوبډله په ٦٧ منډو وسوځوله خو خپله بيا يوازې په ٢٣ مندو وسوځيد .

په دې حساب اوس په بي گروپ کې تايلنډ او مالديف په لومړي او دويم نمبر دي .

د اې گروپ اول نمبر لوبډله به د بي له دويم او د اې دويم به د بي له لومړي ټيم سره په نيمه پايلوبو کې سيالي کوي .