په چاودنه کې د و‌ژل شويو او ټپيانو دقيقه شمېره نه ده په ډاګه شوې.

جنرال رحمت الله روفي له غرمې وروسته په يوۀ خبري ناسته کې ويلي چې د ټانکر په وسيله دغه ځانمرگى بريد شوى دى .

ښاغلى روفي وايي چې په پېښه کې يوۀ مېرمن، دوه ولسي وگړي، د ملي امنيت يو کارکوونکى او دوه پوليس وژل شوي دي .

د کندهار والي د ٤٢ نورو کسانو د ټپي کېدو خبره هم کوي .

رپوټونه وايي چاودنه د ملي امنيت او ولايت شورا ودانيو ته څېرمه شوې، او د ولايتي شورا د غړو د ټپي کېدا خبر هم ورکړل شوى .

د پېښې له ځايه د پوليسو يوه افسر، چې د نامۀ له اخيستو يې ډډه کړې، ويلي چې چاودنه ډېره زروروه وه، او غږ يې په ليرو ځايونو کې هم اورېدل شوى دى .

چاودنه داسې مهال شوې، چې د کندهار ولايتي شورا د احمد ولي کرزي په مشرۍ له ځايي چارواکو سره غونډه روانه وه .

عيني شاهدانو ويلي د شورا ودانۍ ته څېرمه يو موټر ودرېد او چاودنه رامنځ ته شوه .
په چادونه کې د کندهار د ولايتي شورا د ودانۍ ډېرى برخې ويجاړې شوې .

تر اوسه د چاودنې پړه چا پرغاړه نه ده اخيستې، خو احمد ولي کرزي يې پړه پر وسله والو طالبو ور اچولې ده .

سيمه د امنيتي ځواکونو له خوا کلابند ده او نژدې څوک نه ور پرېږدي . او په چاودنه کې د وژل شويو او ټپيانو دقيقه شمېره نه ده په ډاگه شوې.

د تېر سپتمبر په مياشت کې په کندهار کې دوو ځانمرگو بريد کوونکو د کندهار د امنيه قوماندانۍ د ننه ځانونه وچوول، چې په پايله کې پنځه کسان ووژل شول او شاوخو ا٤٠ نور ټپيان شول .