سيد عبدالرحيم له نيويارک څخه

	'' زه باور لرم چې د افغانستان په باب د بارک اوباما اوسنۍ تګلاره چې دی ىې اوس لري او د افغانستان د روانو ستونزولپاره يې وړاندې کړې ده او غواړي له پاکستان سره خبرې اترې وکړي د دې په قول اغېزمنه تګلاره ثابتېدلای شي .''

تاريخي اهميت يې په دې کي بولي چي تر دې دمخه د افريقاالاصله وګړو څخه د ولسمشرۍ ټاکنو ته کانديد نه و ليدل شوی.

د امريکا د ولسمشرۍ ټاکني د ځينو په خبره، پر ټوله نړۍ اقتصادي او سياسي اغېزې کوي. خو په داسې وخت کې چې د دې زبرځواک هېواد په زرګونو لښکر په افغانستان کي په جګړه بوخت دي .

نو د عراق تر څنګ يې ډېره اغېزه پرافغانستان او د ډيورنډ د کرښې په دواړو خواوو کې پرتو وګړو باندې کېږي.

د امريکا په لوی ايالت نيويارک کې هغو افغان الاصله امريکايانو او يا هم هغو افغانانو چې يوازې په امريکا کې استوګنه لري پر افغانستان او افغانانو باندي د دې هېواد د نوي ټاکل شوي ولسمشر بارک اوباما د بهرنۍ تګلارې او د افغانستان لپاره يې د نظامي ستراتيژۍ د اغېزې په باب خبرې راسره کړې دي.

خالد خټک د نيويارک د ښار د کوينز په ناحيه کې د ډيورنډ دکرښې د دواړو غاړو وګړو سره ناسته ولاړه لري اود دوديزو پروګرامونو په جوړولو کي ښه ونډه لري.

ده د امريکا د نوي ټاکل شوي ولسمشر بارک اوباما د سوبې په باب د خپل غبرګون د څرګندولو په ترڅ کې وويل چې په امريکا کې هرولسمشر چې وي دا که بارک اوباما وي او که بوش وي، دا به پر هر هغه ځای ګوزار کوي چې د دوی ګټي يې ايجابوي.

دا پاکستان وي او که قبايلي سيمي. دی وايي چې د امريکا نوی ولسمشربارک اوباما د افغانانو لپاره څه مثبت بدلون نه دی که بدلون وي نو د امريکا په حساب به بدلون وي.

خو افغان الاصله اريا جوشن چې د نيويارک په پوهنتون کي په لوړو زده کړو بوخته ده داسې بېله عقيده لري دا وايي:

'' زه باور لرم چې د افغانستان په باب د بارک اوباما اوسنۍ تګلاره چې دی ىې اوس لري او د افغانستان د روانو ستونزولپاره يې وړاندې کړې ده او غواړي له پاکستان سره خبرې اترې وکړي د دې په قول اغېزمنه تګلاره ثابتېدلای شي .''

خو افغان پروفيسر جاوېد نوابي چې د نيويارک د ښار په کيوني کالج کی د اقتصاد او ټولنپوهنې استاذ دی ټينګار يې پر دې خبره دی چې په خاص ډول اوباما د افغاني سياست لپاره مرستندويه نه دی.

دی وايي اوباما غواړي چي ځواکونه زيات کړي د دې پر ځای چي د اقتصادي چارو سره يې مرسته وکړي. د ده ترټولو زيات ټينګار بيا پردې خبره دی چې د افغانانو ستونزه ترهګري نه ده. ښاغلی نوابي د افغانانو ستونزې د اقتصادي پرمختګ نشتوالی بولي. د دۀ په اند همدا بې کاري ده چې بې کاره زلميان د جګړې و خواته را ماتوي.

خو خالده نادي بيا يوڅه بل ډول نظر لري، دا هم په نيويارک ښار کې يو فيزيشن ډاکتره ده. وايي اوباما غواړي چې د افغانستان ستونزه يوڅه کمه کړي. زه پوهېږم چي په څلورو کالو کي يې نه شي حل کولای. خو بيا هم که غواړي چي نور لښکر واستوي د دې په خبره دا سم کار نه دی. بايد چې ډېر لښکر دوی پاکستان او د افغانستان پولو ته ور واستوي. دا ځکه چې دا وايي ستونزه د افغانستان کورنۍ ستونزه نه ده، دا د بهر څخه پېښه ستونزه ده.