عبدالله ستانکزى له کابله

د ملگرو ملتونو د کډوالو اداره زياتوي ، سږ کال ٩٩ په سلو کې افغان کډوال له پاکستانه او پاتې يوه سلنه يې له ايران او نورو هېوادونو نه پخپله خوښه افغانستان ته راستانه شوي دي.

په ملگرو ملتونو کې د گډوالو اداره وايي د راستنو شويو افغان کډوالو ٩٩ په سلو کې يې له پاکستانه راغلي دي .

په خپله خوښه له نورو هېوادونو نه د افغان کډوالو د بېرته راستنېدنې بهير اووه کاله وړاندې د طالبانو د رژيم تر ړنگېدو وروسته پيل شو.

د تېرو کلونو پرتله له بهرنيو هېوادونو نه د افغان کډوالو بېرته راستنېدنه کمه شوې ده، تېرکال له ٣٥٠ زره زيات افغان کډوال خپل هېواد ته راستانه شول، خو سږ کال دغه شمېره تر ٣٠٠ زره هم لږ ده .

د ملگرو ملتونو د کډوالو اداره( يو ان اچ سي آر) د بېرته راستنېدونکو کډوالو د سست بهير لامل د دوى لپاره د اوسېدو د ځاى نشتوالى او په ځېنو برخو کې امنيتي ستونزې په گوته کوي .

د کارموندې زمينه او اقتصادي وده  د دې له امله، چې د افغانستان نفوس د ١٩٧٩ کال پرتله دوه برابره شوى، خو د کر لپاره ځمکې په هماغه اندازه پاتې دي. د همدې لپاره بايد د کار پيداکولو زمينې برابرې شي او د اقتصادي ودې هڅې گړندى شي، څو افغان کډوال بېرته خپل هېواد ته راستانه شي   اېوېن مکلون

د دغې ادارې سرپرست مشر اېوېن مکلون وايي که څه هم سږکال د تېرو کلونو پرتله د بېرته راستنېدونکو کسانو شمېره لږه ده ، خو وايي دا يو لوى شمېر دى.

ښاغلى مکلون خبردارى ورکوي که په راتلونکو کلونو کې بېرته راستنېدونکو ته د کار موندلو زمينه برابره نشي او په اقتصادي ډگر کې پرمختگ ونشي د افغان کډوالو بېرته راستنېدنه به له يو لړ ننگونو سره مخامخ شي:

'' ددې له امله، چې د افغانستان نفوس د ١٩٧٩ کال پرتله دوه برابره شوى، خو د کر لپاره ځمکې په هماغه اندازه پاتې دي. د همدې لپاره بايد د کار پيداکولو زمينې برابرې شي او د اقتصادي ودې هڅې گړندى شي، څو افغان کډوال بېرته خپل هېواد ته راستانه شي.''

د ملگرو ملتونو د کډوالو اداره زياتوي ، سږ کال ٩٩ په سلو کې افغان کډوال له پاکستانه او پاتې يوه سلنه يې له ايران او نورو هېوادونو نه پخپله خوښه افغانستان ته راستانه شوي دي.

د رسمي شمېرو له مخې د ٢٠٠٢ کال راپدېخوا له پنځه ميليونه نه ورپورته افغان کډوال له بېلابېلو هېوادونو نه خپل هېواد ته راستانه شوي چې د افغانستان د نفوسو نژدې شل سلنه جوړوي .

خو په وروستيو کلونو کې افغان کډوال يو ځل بيا د نړۍ بېلابېلو هېوادونو ته مخه کړې .دوى نورو هېوادونو ته د بېرته تلو اصلي لاملونه د امنيت نشتوالى، بيکاري، بې وزلي، لوږه او د اوسېدو د ځاى نشتوالى په گوته کوي .