جعفرهاند له کابله

	په کابل کې له دغه لاريون سره هممهاله له باميانو نه هم د لاريون خبرونه ورکړل شوي دي .

لاريون کوونکو د يادې شوې ستونزې په نه هواري افغان حکومت تورن کړ او د ولسمشر کرزي په گډون يې د يو شمېر وزيرانو د استعفا غوښتنه وکړه .

پوليسو اجازه ورنه کړه چې لاريون د دهمزنگ له سيمې نه دښار نورو برخو ته وغزيږي .

لاريون داسې مهال کېږي چې وړمه ورځ ولسمشر حامد کرزي له کوچپانو وغوښتل چې د اوس لپاره د وردگوله بهسودو ولسوالۍ څخه ووځي .

د کابل ښار د د همزنگ څلور لارې ته سهار وختې لسگونه بلوا ضد پوليس او افغان پوځيان ولاړ ول چې د هزاره توکموپه لاريون کې د پېښېدونکي تاوتريخوالي مخه ونيسي .

لاريون کوونکو د افغان حکومت پر ضد شعارونه ورکول او د وردگو له ولايت څخه يې د هغو کوچيانو د ژرتر ژره وتلو غوښتنه کوله چې د دوى په ادعا د هزاره گانو ځمکې يې لاندې کړې او کسان يې ور وژلي دي .

مظاهره کوونکو د هغو کسانو عکسونه هم له ځانه سره لرل چې د دوى په وينا له کوچيانو سره د وردگو د بهسودو ولسوالۍ په نښتو کې وژل شوي او ژوبل شوي دي .

احتجاج کوونکو له افغان حکومت نه وغوښتل چې د کوچيانو او سيمه ييزو هزاره گانوترمنځ د ځمکو او څړځايونو پر سر را ولاړه شوې شخړه دې د تل لپاره هواره کړي .

دوى پر افغان حکومت تور ولگاوۀ، چې د دغې ستونزې په هواري کې يې کوټلي او بي طرفه گامونه نه دي پورته کړي :

'' کرزي صاحب يو پيغام خپور کړى او له کوچيانو يې وغوښته چې بېرته ولاړي،کوچيانو له کومه راغلي ول چې بېرته ووځي .

له کرزي صاحب نه زموږ غوښتنه دا ده چې پر ټولو خلکو ټولنيز عدالت يو ډوبل پلې کړي .
د يو او يو بل قوم غوره والي په اړې دې فکر نکوي، له يوه ځانگړي قوم سره مرسته کول ناقانوني او ټکر رامنځ ته کوي '' .

لاريون کوونکو په پاى کې يو پرېکړه ليک ولوست چې په کې د ولسمشر کرزي، د دفاع او کورنيو چارو وزيرانو د استعفا غوښتنه شوې .

افغان پوليسو مظاهر کوونکو ته اجازه ورنه کړه چې د کابل ښار زړۀ ته ننوځي .

په همدې ترڅ کې له مرکزي ولايت باميانو څخه هم د ورته لاريون خبرونه ترلاسه شوي .

د کوچيانو او هزاره گانو ترمنځ له تيرو څو کلونو راهيسې دوو کلونو راهيسي د ځمکو او څړ ځايونوپرسر لانجه روانه ده چې،په ترڅ کې يې دواړو خواوو ته مرک ژوبله هم اوښتې.