په هلمند کې چارواکي وايي چې په دې پېښه کې درې ولسي وگړي ټپيان شوي دي

لومړى ځانمرگى بريد نن (چارشنبې، د غبرگولي اتمه) سهار شاوخوا لس بجې د لښگاه په ښار کې د ملي امنيت رياست ته نژدې شوى .

په هلمند کې چارواکي وايي چې په دې پېښه کې درې ولسي وگړي ټپيان شوي دي .

د پېښې عيني شاهدانو پروينا، ځانمرگى بريد کوونکى پر موټر سايکل سپور و او د هلمند د لښکرگاه د ملي امنيت مامورين يې څارل، چې له وخته مخکې يې د ياد شوي رياست دروازې ته څېرمه ځان وچووه .

دويم ځانمرگى بريد هم سهار په ١١ بجو شاوخوا کې د خوست ولايت په گربزو ولسوالۍ کې شوى .

په خوست کې د گربزو ولسوال محمد اکبر ځدراڼ بي بي سي ته وويل د ملي اردو په جامو کې دوه کسان چې په سراچه موټر کې سپاره ول چې د ولسوالۍ ودانۍ ته يې ننوتل غوښتل .

له دغو دوو کسانو څخه يو تن په دې پلمه چې گواکې له امريکايانو سره کار لري، د ولسوالۍ انگړ ته داخل شو او هلته يې ځان وچووه .

دويم کس چې په سراچه کې لا سپور و او وسله هم ورسره وه، له پوليسو سره يې نښته پيل کړه چې بيا وروسته دى هم ووژل شو .

	لا تروسه ددې پېښې پړه چا پر غاړه نه ده اخيستې .

د خوست والي ارسلا جمال ويلي چې په پېښه کې يو ولسي وگړى او دوه امريکايان ټپيان شوي دي .

خو وسله وال طالبان بيا ددې پېښې پړه پرخپله غاړه اخلي او دا ادعا کوي چې لس بهرني او داخلي پوځيان يې وژلي دي، چې دا ادعا بيا چارواکي نه مني .

د گربزو ولسوالي د امريکايانو له قرارگاه سره په سل مترۍ ليرې واټن کې پرته ده .

د روان زيږديز کال له پيل راهيسې له نننيو دوو ځانمرگو بريدونو سره د هېواد په بېلا بېلو سيمو کې ٣٩ ځانمرګي بريدونه شوي، په داسې حال کې، چې په تېر زيږديز کال کې ١٣٧ ځانمرګي بريدونه شوي وو.