عبدالصمد روحاني له لښکرگاه څخه

	په ګرمسېركې د نړيوالو ځواكونو پوځي عمليات څه باندې لس ورځې وړاندې پيل شوي دي .

دوي وايي چې د ولسوالۍ په څو ورځنيو عملياتو كې د نړيوالو ځواكونو اووسله والو طالبانو ترمنځ په نښتو كې يوشمېر ولسي وګړي وژل شوي هم دي .

ددې ولسوالۍ يوشمېر بېځايه شوو خلكو له بي بي سي سره په خبرو كې وويل چې له يوې خوا يې وسله وال طالبان په كورنو ورننوځي اوله بل پلوه يې د نړيوالو سرتېرو هوايي بمباريو ژوند له ګواښ سره مخامخ كړى دى .

په ګرمسېركې د نړيوالو ځواكونو پوځي عمليات څه باندې لس ورځې وړاندې پيل شوي دي .

د ګرمسېر ولسوالۍ په زرګونو ولسي وګړي وروسته له هغه بېځايه شول، چې لس ورځې وړاندې يې د نړيوالو سرتېرو له خوا په ولسوالۍ كې د طالبانو پرضد پوځي عمليات پيل شول .

دغه عمليات كه څه هم حكومتي چارواكي يې ډېر پياوړي بولي، خو ولسي وګړي وايي چې دوى يې له سختو ستونزو سره مخامخ كړى دي .

ددغه ولسوالۍ د دېرشو كورنيو په شاوخوا كې چې د هلمند مركز لښكرګاه ته راغلي وايي چې د نړيوالو سرتېرو د هوايي بمباريو له كبله د يوشمېر ولسي وګړو تر وژل كېدو وروسته په زرګونو خلكو خپلو کورونو پېښودو ته اړ شول .

ددې ولسوالۍ يو اوسېدونكى عبدالله د خپل ځان او نورو ولسي وګړو د ژوند د حالت په اړه وايي :

'' موږ ټول د نړيوالو ځواكونو د بمباريو له كبله خپل كورونه پرېښودل . هلته ډېره سخته جګړه وه طالبانو هم راڅخه د سپر كار اخيست او نړيوالو ځواكونو چې به هم هرڅوك وليد نو ډزې به يې ورباندې كولي اوهغه به يي واژۀ، موږ په زرګونو خلكو خپل كورونه پرېښودل .''

د هلمنديو شمېرځايي چارواكي هم مني چې د نړيوالو سرتېرو او وسله والو طالبانو ترمنځ په نښتو كې يو شمېر ولسي وګړي زيانمن شوي دي .

د نوموړي ولايت د ولايتي شورا چارواكي وايي چې له لسو زرو څخه تر پنځلس زرو پورې كورنۍ ښايي دښتونو ته وتلې وي .

ددغه شورا رئيس حاجي محمدانور له بي بي سي سره په خبرو كې وويل چې ګڼ ولسي وګړي بېړنيو مرستو ته اړتيالري .

د هلمند والي محمدګلاب منګل كه څه هم د نړيوالو ځواكونو په پوځي عملياتو كې د يوشمېر ځايي وګړو بېځايه كېدل نه ردوي، خو وايي چې عمليات په ډېراحتياط سره پرمخ ځي .

هغه بيا د ولسي وګړو د بېځايه كېدا لامل دا بولي چې ګواكې وسله وال طالبان د هغوى په كورونو ور ننوځي، خو دا هغه ادعا ده چې طالبان يې په كلكه ردوي .

ښاغلى منگل وايي:'' هلته عمليات په ډېر احتياط سره پرمخ درومي، ښايي يو شمېر هغه كورنۍ بېځايه شوې وي چې طالبان يې پر كورونو ورننوځي، موږ د هغوى لپاره بېړنۍ مرستې برابرې كړې دي .''

د ګرمسېر ولسوالۍ ډېرى خلك كروندګر دي، نوځكه وايي چې د نړيوالو سرتېرو پوځي عملياتو يې كروندو ته هم سخت زيان اړولى دى .

ډېرى كروندګرو وويل چې كه دغه عمليات ژر پاى ته ونه رسيږي نو ښايي ددوى كروندې به وچې پاتې شي .

خو برعكس، د هلمند چارواكي وايي چې د ولسي وګړو د زيان د مخنوي په موخه ښايي دغه پوځي عمليات ژر پاى ونه مومي .