متين سمسور له عشق اباد څخه

	د نوي ترکمن ولسمشر له ټاکلو وروسته دا ترکمنستان ته د ولسمشر کرزي لومړى سفر دى

ښاغلى حامد کرزى د ترکمنستان د ولسمشر قربان على بردي محمد اف په بلنه د پنجشنبې له ورځې په ترکمنستان کې دى چې د ښاغلي محمد اف له ټاکنې وروسته يې هغه هيواد ته لومړنى سفر دى .

ترکمن چارواکي وايي چې د افغانستان او ترکمنستان چارواکو د برېښنا او گازو د صادرولو په برخه کې خبرې کړي او سره چمتو شوي چې د دواړو هيوادونو ترمنځ د لا ډيرو اقتصادي همکاريو لپاره دې شرايط جوړ شي .

له تيرو نژدې ١٥ کلونو څخه ترکمنستان ليوالتيا ښيي چې د افغانستان له لارې هند او پاکستان ته گاز صادر کړي .

ترکمنستان د گازو ځينې سترې زيرمې لري چې ډيره برخه يې د روسيې له لارې نورې نړۍ ته ليږدي خو ترکمن چارواکي ليواله دي چې د گازو لپاره نوي بازارونه ومومي .

د ٢٠٠٦ کال د فبروري په مياشت کې رپوټ ورکړل شوى و چې افغانستان ، ترکمنستان او پاکستان د گازو د نلليکې د غځولو په برخه کې سره سلا شوي دي .

دغه نلليکه به شاوخوا ١٣٠٠ کيلومتره اوږده وي چې څو ميليارده ډالره پانگونه غواړي .

د پانگوالو له موندلو سره جوخت په افغانستان کې د امنيت ستونزو د دغې نلليکې برخليک د ډيرو په گومان تت پرايښى دى .