د ترکیې سکرو کان کې چاودنه

14 می 2014 - 24 غویی 1393 د خپرېدو نیټه 11:31 گرینویچ

د ترکیې سکرو کان کې چاودنه
د ترکیې په لویدیځ کې د سکرو په یوه کان کې چاودنې له امله لږ ترلږه ۲۰۱ کسان وژل شوي او یو شمېر نور ټپیان دي.
ترکیه کې د انرژۍ وزیر طایر یلدیز وویل چې د چاودنې پرمهال په کان کې ۷۸۷ کسان موجود وو. د نوموړي په وینا چاودنه د برېښنا د شارتې له امله رامنځ ته شوې ده.
ژغورونکو ټوله شپه کار وکړ خو د انرژۍ وزیر ښاغلی یلدیز وايي چې د نورو کسانو د ژوندي ژغورنې هیلې په کمېدو دي.
د پلازمینې انقرې په لویدیځ کې د دغه شخصي کان مخې ته د کان کېدونکو خپل خپلوان ټول شوي وو.
د ترکيې د انرژۍ وزیر طایر یلدیز پر تلویزیون په وینا کې تایید کړه چې په دې پېښه کې لسګونه کسان ټپیان شوي دي.
د انرژۍ وزیر وايي چې د وژل شویو هغو په ګډون تقریباً ۳۶۰ کسان له کانه ایستل شوي دي.
فکر کېږي چې د ډېرو کسانو ژوند کاربن مونواکساید ترې اخیستی. په کان کې له ایسارو کسانو سره د مرستې په خاطر کان ته اکسیجن پمپ شو.
ویل کېږي هغه کسان چې په کان کې ایسار پاتي دي دوه کیلو متره د ځمکې لاندې او د کان له دروازې نه څلور کیلومتره لري دي.
چاودنه په سیمه ییز وخت د ورځې په دوه نیمو بجو وشوه. په پیل کې ویل کېدل چې ۱۷ کسان وژل شوي خو د وژل شویو کسانو شمېر په چټکۍ پورته شو.
پر تلویزیون ژغورونکي ښودل کېدل چې کان کېدونکي ژغوري.
پولیسو د کان په شاخوا کې ټول شوي خلک کنترولول څو ژغورونکي وکولای شي چې په ښه توګه خپل کار پرمخ یوسي.