د روغتيا وزير وايي له دغې ناروغۍ سره د مبارزې لپاره روغتيايي تدبيرونه نيولي او د افغانستان ټولو ولايتونو ته يې اړين دارو درمل ليږلي دي .

د روغتيا وزارت چارواکي وايي د سرکوزي د والگي له امله د مړيو شويو افغانانو شمېر ١١ او په دې ناروغۍ د اخته و کسانو شمير ٧٧٩ ته رسېدلى دى .

د افغانستان دعامې روغتيا وزارت له ټولو خلکو يو ځل بيا وغوښتل چې د دغې ناروغۍ د خپريدو د مخنيوي لپاره دې روغتيايي ويقايوي تدبيرونو ته پاملرنه وکړي .

په افغانستان کې د سرکوزي په والگي د مړو شويو کسانو شمېر ورځ تر بلې لوړيږي .

د افغانستان د عامې روغتيا وزارت وروستۍ شميرې ښيي چې د دغې ناروغۍ له امله د مړيو شويو کسانو شمير يولسو کسانو ته پورته شوې ده. د تيرې اونۍ په وروستيو کې دغه شمېره ٨ تنه ښوول شوې وه.

روغتيايي چارواکي وايي د مړو شمير له هغې وروسته له لسو پورته شوه چې تيره ورځ يوه ميندواره ښځه د دغې ناروغۍ گواښ ته د نه پاملرنې له امله مړه شوه .

د افغانستان د عامې روغتيا وزير سيد محمد امين فاطمي وويل تر اوسه په افغانستان کې نژدې ٧٨٠ تنه د سرکوزي په والگي اخته شوي چې له نيمايي ډير يې افغانان دي .

د ښاغلي فاطمي په وينا د پلازمينې کابل سربيره کندهار،هرات،باميان،بلخ او هرات ولايتونه دي چې د سرکوزي د والگي ناروغۍ نښې پکې ليدل شوي دي.

د دغو ناروغانو ډيره په پلازمينه کابل کې دي.

ښاغلي فاطيمي گواښنه وکړه چې له وقايعوي تدبيرونو سره سره ښايي د سرکوزي د والگي په ناروغۍ لږ تر لږه له ٢ نه تر ٣ زره افغانان خپل ژوند له لاسه ورکړي.

ښاغلي فاطمي له ټولو افغانانو وغوښتل چې د عامې روغتيا وزارت وقايعوي تدبيرونو ته پاملرنه وکړي .

د ورځې درې ځله د ستوني له لارې د مالگوبي غړ غړه کول او په پوځې کښول او د تودو مايعاتو څښل هغه څه دي چې روغتيايي چارواکي يې د دغې ناروغۍ ښه مخنيوى گڼي .

د ښاغلي فاطمي په وينا ښايي په افغانستان کې د سرکوزي د والگي ويروس لومړى او دويم پړاو چې لومړى يې اوس او دويم به يي ښايي د راتلونکي کال په تور غويې مياشتې کې وي د چاپيريال د نه مناسبتيا له امله کابو شي .

خو هغه د دغې ناروغۍ دريم احتمالي پړاو چې ښايي د راتلونکي کال په ميزان مياشتې وي تر ټولو خطرناکه وبلله .

د سرکوزي د والگي د ناروغۍ پر وړاندې په افغانستان کې له ٥ کلونو د عمره ماشومانو د بدن د مقاومت د لوړوالي په موخه ټاکل شوې پر نژدې ٧ ميليونو افغان ماشومانو د گوزڼ واکسين د کمپاين پرمهال ځانگړي درمل وويشل شي .

د گوزڼ واکسين د راتلونکي اونۍ په يکشنبې ورځ په ټول افغانستان کې پيليږي .

د افغانستان د عامې روغتيا وزير په داسې مهال په احتمالي ډول د سرکوزي په والگي د ميليونونو کسانو د اخته کيدواټکل کوي چې په دغه هيواد کې اوس يوازې د ١٣ زره ناروغانو د درملنې لپاره بسترونه شته .