بي بي سي پښتو ډاټ کام

	کاناډا افغانستان کې شاوخوا ٢٨٠٠ پوځيان لري .

د تېرې جمعې په ورځ د کاناډا کانويسټ نيوز اژانس د دفاع وزارت د چارواکو له خولي ويلي وو چې د هېواد لوی درستيز جنرال والټر ناتينيزک له افغانستانه د کاناډايي سرتېرو د ستنېدو پر اړه په يوه پلان کار کوي .

کاناډا افغانستان کې شاوخوا ٢٨٠٠ پوځيان لري، چې زياتره برخه د هېواد په سوېلي نارامه ولايتونو کې مېشت دي .

وړاندې د کاناډا لومړي وزير سټيفن هارپر د دېر سپتمبر مياشت کې واشنګټن کې امريکايي پوځي مشرانو ته ويلي وو چې هېواد يې افغانستان کې خپل پوځي ماموريت پای ته رسول غواړي .

د ويلو ده چې له ٢٠٠٢ کال راپدېخوا افغانستان کې ١٣٣ کاناډايي پوځيان وژل شوي .

د برتانيا دريځ

بل خوا د برتانيا لومړي وزير ګورډن براون ويلي که چېرې افغان ولسمشر حامد کرزی په خپله اداره کې د فساد پرضد مبارزه ګړندۍ کړي، نو برتانيا به دغه هېواد ته نور سرتېري واستوي .

ګورډن براون دغه څرګندونې تېره ورځ (جمعه، د نومبر شپږمه، د لړم (عقرب) پر پنځه لسمه ) وکړه .

نوموړي وويل : ((تر هغه چې د پاکستان او افغانستان لخوا برتانيا ته متوجه ترهګريزې چينې نه وي وچې شوې، موږ بايد له دغه هېواده ونه وزو او نه به دا کار وکړو .))

د برتانيا لومړي وزير دا هم وويل د کرزي پنځه کلنه راتلونکې دوره په پنځو اساسي مسايلو کې د ده بريا ځواکمنوي، چې هغه ، امنيت، واکمني، سوله، اقتصادي پرمختګ او له ګاونډيانو سره ښه اړيکي دي .

برتانيا دا مهال افغانستان کې تر نهو زرو ډېر سرتېري لري، چې زياتره يې په نارامه سوېلي ولايت هلمند کې مېشت دي .