لاريون کوونکو دا گواښ هم کړى که چېرې حکومت د پدرام په اړه غبرگون ونه ښيي، نو ختيځ ولايتونه به په راتلونکو ټاکنو کې برخه وانخلي .

لاريون نن چارشنبه (د جولاى ٢٣) سهار په نهو بجو پيل او د جلال اباد په سلگونه ښاريانو پکې گډون کړى و .

لاريون کوونکي لاريون په سوله ييز ډول د پښتونستان له واټ نه پيل او د غازي امان الله خان په مزار يې د يوې لنډې غونډې په کولو سره پاى ته ورساوۀ .

لاريون کوونکو د (پدرام مرده باد) شعارونه له ځانه سره لېږدول او له افغان حکومته يې د ده د گوند د منحلولو او د ده د محاکمې غوښتنه يې وکړه .

د ملي کنگرې مشر لطيف پدرام په خپلو خبرو کې غازي امان الله خان په سپکو سپورو الفاظو ياد کړى و.

په لاريون کې ځينو ژورنالېستانو او فرهنگپالو هم برخه اخيستې وه، او له افغان ولس نه يې وغوښتل چې د پدرام د څرگندونو په اړه ولس خپل غبرگون وښيي .

لاريون کوونکو پدرام په افغانستان کې ژبنيو تعصبونو ته په لمن وهلو تورن کړ .

د لاريون په پاى کې مظاهره کوونکو يو پرېکړه ليک هم صادر کړ چې په کې د پدرام د محاکمې غوښتنه شوې وه .

لاريون کوونکو دا گواښ هم کړى که چېرې حکومت د پدرام په اړه غبرگون ونه ښيي، نو ختيځ ولايتونه به په راتلونکو ټاکنو کې برخه وانخلي .

پرېکړه ليک له نړيوالو سازمانونو څخه هم د ده په محاکمه کولو کې د مرستې غوښتنه کړې ده .

لاريون کوونکو د افغانستان له ولسي جرگې نه هم د پدرام په اړه د پرېکنده فيصلې غوښتنه وکړه .