احسان الله مهجور له پکتيکا څخه

	د پکتيکا د والي وياند محمديار غمى خان د پکتيا اړونده په زاوو سيمه کې په خپل کور کې وژل شوى دى .

د پکتيکا والي ډاکټر اکرم خپلواک رسنيو ته ويلي چې ښاغلى غمى خان د پکتيا د مرکز په اړونده زاوو سيمه کې، چې د دغه ښار قل اردو ته په درې کيلومترۍ کې واټن لري، په خپل کور کې د وسله والو له خوا وژل شوى دى .

بل خوا د پکتيا د والي وياند روح الله سمون بي بي سي ته وويل چې د شپې مهال وسله وال پر دېواله د محمد يار غمي خان کور ته ور اوښتي او هلته يې بريد ورباندې کړى دى .

د ښاغلي سمون په وينا، په بريد کې د پکتيکا د والي وياند وژل شوى او د ده مور، مېرمن او دوه ماشومان ټپيان شوي دي .

ښاغلى سمون وايي چې وسله والو له ځانه سره د محمد يار غمي خان ورور ثابت الله هم له خپل ځانه سره ژوندى بېولى دى .

ټپيان د گردېز صحي روغتون ته وړل شوي او روغتيايي حالت يې د ډاډ وړ ښودل شوى دى .

سيمې ته امنيتي کارکوونکي تللي چې د پېښې په اړه پلټنې وکړي .

د محمديارغمي خان د وژنې پړه وسله والو طالبانو پرغاړه اخيستې ده .

د دغې ډلې يوۀ تن وياند ذبيح الله مجاهد بي بي سي ته له نامعلوم ځايه د تيلېفون په کرښه ويلي چې د پکتيکا د والي وياند د دوى جنگياليو وژلى دى .

ښاغلي مجاهد دا هم وويل چې د محمد يار غمي خان ورور يې له ځانه سره ژوندى بېولى دى .

د چنگاښ مياشتې پر ٣٠ هم د پکتيکا ولايت په اومنه او چارباران ولسواليو کې د دوو قومي مشرانو په گډن د وسله والو کسانو له خوا څلور کسان وژل شوي وو.