نعمت الله کرياب بي بي سي پښتو ټکى کام

	بهرنيو ځواکونو لا تراوسه په فراه ولايت کې خپلو څلورو سرتېرو د وژل کېدو په اړه څه نه دي ويلي .

د فراه ولايت د والي مرستيال محمد يونس رسولي بي بي سي ته ويلي چې د نړيوالو ځواکونو دغه څلور سرتېري د بکوا – دلارام ترمنځ د لارې د غاړې په بمي چاودنه کې وژل شوي .

خو لا تراوسه بهرنيو ځواکونو د خپل څلورو سرتېرو د وژل کېدو پخلى نه دى کړى .

د طالبانو وياند قاري يوسف احمدي د دغې چاودنې مسووليت په غاړه اخيستى و .

بل پلو د همدې ولايت د بالا بلوک ولسوالۍ په شېوان سيمه کې طالبانو د افغان او بهرنيو ځواکونو پر کاروان بريد کړى .

د فراه چارواکي وايي په بريد کې دوه پوليس وژل شوي څلور نور ټپيان دي .

سيمه ييز امنيتي چارواکي د لسگونو طالبانو د وژلو او ټپي کېدو ادعا کوي .

د طالبانو يوه وياند قاري يوسف احمدي هم ادعا کړې چې افغان ا وبهرنيو ځواکونو ته يې دغلته د سر دروند زيان ور اړولى دى .

په خوست کې چاودنې څلور ولسي وگړي ووژل

بل پلو د سوېل ختيځ ولايت خوست په تڼيو ولسوالۍ کې د سپرلۍ يو گاډى د لارې د غاړې په ښخ شوي بم ور برابر شوى .

سيمه ييزو چارواکي وايي په پېښه کې څلور ولسي وگړي، چې يو يې ښځه او يو کوچنى دى وژل شوي .

طالبانو څلور وروڼه پوليس ووژل

له بلې خوا د غزني دو الي وياند اسماعيل جهانگير وايي په قره باغ ولسوالۍ کې وسله والو طالبانو تېره شپه څلور وروڼه پوليس وژلي .

که دلته پوليس وژل شوي، خو په ختيځ کونړ ولايت کې وسله وال طالبان وايي هغه درې نيول شوي پوليس يې د سپين روبو په غوښتنه خوشي کړي .

دغه پوليس تېره ورځ د چپې درې د ولسوالۍ پر ودانۍ تر بريد وروسته طالبانو نيولي وو .

چارواکي وايي د طالبانو يو مړى د ولسوالۍ په انگړ پاتې شوى و، چې هغه يې هم طالبانو ته ورسپارلى .