حنان حبيبزى له کابله

	د افغانستان پخوانى ټولواک چې متوکل على الله اود ملت بابا ياديده د ملي يو والي د نښې يا سمبول په توگه مشهور شوى وو .

د فاتحې بهير له سيمه ييز دود سره سم اخيستل کيږي ، د گډون والو شمير څو برابره ډير شوى دى.

پرون په زرگونو خلکو له ارگ څخه د مرنجان تر غونډۍ پورې د محمد ظاهر شاه تابوت ته وروستى درناوى وړاندې کړ .

دده تابوت د خپل پلار نادر خان ترڅنگ خاورو ته وسپارل شو .

ښځې هم په دعا کې گډون کوي ، ټاکل شوې ده چې سبا د ارگ د سلام خانې په ماڼۍ کې د افغان ولسمشر ميرمن ، دولتي چارواکې ، د ټولواک د کورنۍ غړې او عادي افغانانې په فاتحه کې گډون وکړي .

پرون د جنازې په بهير کې هم ښځو گډون کړى وو .

د افغانستان له يو شمير ولسواليو څخه چارواکو د بي بي سي د کابل دفتر ته ټليفون وکړ او د خپلو سيمو په ډيرى جوماتونو کې يې د پخواني ټولواک روح ته ددعا او د فاتحې د اخيستلو خبر راکړ .

د کابل د عيدگاه په جومات کې د افغان ولسمشر حامد کرزي ، د افغانستان د کابينې د غړو او د پخواني ټولواک د کورنۍ د نارينه غړو په گډون زرگونو او ښايي په لسگونو زره خلکو د پخواني ټولواک روح ته په پرله پسې توگه دعا او ښې هيلې وړاندې کړې .

په کابل کې د افغانستان له ټلويژون څخه د فاتحې بهير په ژوندي ډول ښودل کيږي چې د قران کريم له لوستلو وروسته د ټولواک روح ته خلک دعا کوي .

ټاکل شوې ده چې له فاتحې وروسته په سلگونو ميږې د افغانستان په ټولو ولايتونو کې حلالې شي او له دود سره سم د ماښام دډوډۍ لپاره د پخواني ټولواک په ياد خلکو ته وويشل شي .

ډيرو افغانانو وويل چې دوى د پخواني ټولواک په مړينې خپه دي او د پاخه عمر يو شمير کسان ليدل کيدل چې د محمد ظاهر شاه په ياد يې ژړلې .

د افغانستان پخوانى ټولواک چې متوکل على الله اود ملت بابا ياديده د ملي يو والي د نښې يا سمبول په توگه مشهور شوى وو .

د هغه ټينگار د خلکو پر يو والي او په افغانستان کې د سولې پر ټينگښت وو .

ظاهر شاه د خپل پلار له مرگ وروسته څلور لسيزې د افغانستان د ټولواک په توگه پاتې شو خو د ژوند درې نورې لسيزې يې په جلا وطنۍ کې تيرې کړې .

دده د واکمنۍ پر وخت افغانستان ارامه وو او د ولسواکۍ د رامنځته کولو هڅې يې وکړې .

خو دى بيا دسردار محمد داود خان له خوا چې دده د اکا زوى کيده د يوې سپينې کودتا په ترڅ کې له واکه گوښه شو او په ايټاليا کې ميشت شو