د افغانستان او ازبکستان ترمنځ اړيکې چې د کورنۍ جگړې په کلونو کې په ټپه درېدلې وې، اوس بېرته ښې شوې دي

دغه هوکړه له تاشکند څخه د افغانستان د سوداگرۍ وزير، امين فرهنگ، د ليدنې په ترڅ کې شوې. ښاغلى فرهنگ وايي ازبکستان همدا ډول موافقه کړې چې له افغانستان څخه هغۀ هېواد ته د وارداتي توکو په لړ کې ځينې نوي شيان هم ورزيات کړي.

ښاغلي فرهنگ له تاشکند څخه خپله ليدنه گټوره وبلله او پايله يې د افغانستان او ازبکستان تر منځ د څو تړونونو لاسليکول وښوول.

دۀ وويل ازبکستان ومنله چې د تېلو او گاز د صادراتو د کچې له لوړولو سربېره به، د اړتيا په مهال افغانستان ته نوره برېښنا هم ورکړي.

د سوداگرۍ د وزير په وينا، دوى پرېکړه وکړه چې دواړه هېوادونه دې په گډه سره د امو سېند له اوبو څخه د کرنې لپاره گټه واخلي. همدارنگه ازبکستان به د افغانستان هغو سيمو ته د اوبو د لېږدولو په برخه کې تخنيکي مرسته کوي چې د اوبو له کمښت سره مخامخ دي.

ښاغلي فرهنگ وويل نور تړونونه د پلونو او سړک جوړونې په برخه کې له ازبکستان سره لاسليک شول.

د سوداگرۍ د وزير په خبره، ازبکستان همدا ډول ژمنه وکړه چې دوى به هغه سيلانيان چې له ازبکستان څخه ليدنه کوي وهڅوي چې د افغانستان شمالي سيمو ته هم ولاړ شي.

د نويو تړونونو له مخې، ازبکستان ته به د افغانستان د معدني اوبو، وچې ميوې او ځينې کرنيزو پيداوارو د صادراتو کچه هم لوړه شي.

افغانستان له پخوا راهيسې له ازبکستان سره ښې اړيکې لرلې، خو د کورنيو جگړو لامله د دوو گاونډيانو تر منځ راشه درشه بېرته کمه شوه.

اوس چې د دواړو هېوادونو اړيکې بېرته ښې شوې، افغانستان ازبکستان ته ١٢ ميليونه کلني صادرات لري. افغانستان ته د هغۀ هېواد واردات بيا تر دې ډېر لوړ دي چې په کال کې شاوخوا ٢٠٠ ميليون ډالرو ته رسېږي.