BBC navigation

کرزی: طالبان د اسلام د بدنامولو دنده ترسره کوي

د خپريدو وخت: 16:34 گرینویچ - چارشنبه 04 سپتمبر 2013 - 13 وږی 1392

د افغانستان ولسمشر حامد کرزي د غزني ولایت پر یوه دیني عالم مولوي نورالحق باندې د برید د غندلو پر وخت ویلي چې ګواکې طالبان دا کار د دوی په وینا د اسلام د بدنامولو لپاره کوي.

افغان ولسمشر حامد کرزي پر وسله والو طالبانو تور لګولی دی چې د ده په وینا د اسلام د بدنامولو او تخریب دنده ورسپارل شوې ده خو دا نه وايي چې د چا له لوري دا کار شوی دی.

د افغانستان ولسمشر حامد کرزي د غزني ولایت پر یوه دیني عالم مولوي نورالحق باندې د برید د غندلو پر وخت ویلي چې ګواکې طالبان دا کار د دوی په وینا د اسلام د بدنامولو لپاره کوي.

د غزني والایت چارواکي وايي تېره شپه (د سپتمبر درېیمه) طالبانو په غزني کې د ۸۵ کلن دیني عالم مولوي نورالحق په کور باندې برید وکړ او دغه دیني عالم او د هغه دوه زامن یې ووژل.

په کابل کې د ولسمشرۍ دفتر وايي چې ولسمشر حامد کرزي د دغه برید په محکومولو سره وویل:

"طالبانو ته د هغوی د بهرنیو بادارانو له خوا د اسلام د تخریب او بدنامولو وظیفه ورسپارل شوې ده. طالبانو ته دا دنده ورکړل شوې ده چې پر جوماتونو او د خلکو پر دیني مراسمو بریدونه وکړي او د افغانستان جید دیني علما شهیدان کړي."

د ولسمشرۍ دفتر دا و نه ویل چې له 'بهرنیو بادارانو' څخه د ولسمشر مطلب څوک دی.

خو د ولسمشر له خولې د دوی دفتر د يوه مطلب د خپراوي پر وخت وویل: "لکه څنګه چې موږ پخوا هم ویلي دي، طالبان به د خپلو دغو غیر اسلامي اعمالو د ترسره کولو په خاطر افغان مسلمان ولس ته ځواب ورکوونکي وي."

تر دې دمه وسله والو طالبانو د دغه دیني عالم د وژلو په برخه کې څه نه دې ويلي.

په تېرو وختونو کې وسله والو طالبانو ځینې هغه دیني علما وژلي چې د دوی په وینا د حکومت پلوي وو.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .