د وروستي خبر د خپريدا وخت اپريل 1, 2011 گرينويچ 06:58
په هند کې د هلکانو په پرتله لا هم نجونې کمې دي
د هند د وګړيو شمېر له يو مليارد زيات شوی دی.
په هند کې د روان ۲۰۱۱ کال سرشمېرنې د هند د وګړيو په شمېر کې د اندېښنو وړ اړخ راسپړلی دی.د سر شمېرنې لومړنۍ پايلې د دې څرګندونه کوي چې د تېر په پرتله د نجونو شمېر له هلکانو لا ډېر کم شوی دی.
د روان کال شمېرنې ښيي چې په تېره يوه لسيزه کې د هند پر نفوس ۱۸۱ ميليونه نور وګړي هم ور زيات شوي، او اوس يې د ټولو وګړيو شمېر يو مليارد او ۲۱۰ ميليونه ته رسېدلی دی.
په دې سره هند د ګڼ نفوسه هېوادونو امريکا، اندونيزيا، برازيل، پاکستان او بنګله دېش له ګډ نفوس هم ډېر وګړي لري.
په هند کې د شمېرنې ادارې يو چارواکي ويلي دغې سر شمېرنې له ځانه سره ژورې اندېښنې لرلې او دا ښيي چې په تېرو څو لسيزو کې په ټولنه کې د بدلون تګلارې چې د نجونو شمېر زياتوالي لپاره ټاکل شوې وې، ډېرې ښې پايلې يې نه لرلې.
د ښځينه جنين يا نوې زېږېدلې نجلۍ د وژنې او مرګ مخنيوی په تېر کې د حکومتي تګلارو مهمه برخه و.
په هند کې ميندې پلرونه تل زامن له لوڼو غوره بولي، او په دغه هېواد کې د نجونو د زېږېدو انډول په ۵۰ تېرو کلونو کې په پرله پسې ډول په لوړېدو دی.
د وروستۍ سرشمېرنې نښې ښيي چې د نجونو زېږېدا د بل هر وخت په پرتله ټيټه شوې ده.
حکومت وايي دغه شمېرې د خورا سختې اندېښنې خبره ده، او دې حالت ته په کتو به پر خپلو تګلارو له سره بشپړ غور کوي.
زموږ په ټولنه کې بايد لوڼې واده کړی شي، دوی بل کور ته ځي او هلته بايد خسرخېلو ته پاملرنه وکړي، دا تر اوسه دود دی.نو نجلۍ نن د يوې کورنۍ لپاره د يو دروند بار معنی لري.
ماري جان
اوولس کاله وړاندې هند د ميندو پلرونو له خوا د تشخيص پر لارو چارو چې له مخې يې ماشوم ټاکل کېږي، بنديز ولګاوه.
خو دغه ګام په ښکاره توګه د زېږېدو پر مهال يا ترې وروسته د ښځينه ماشومانو وژنه نه ده درولې.
ښځينه فعالانې وايي ځينې هندي ميندې او پلرونه، نجونې يو بار بولي. ماري جان په ډيلي کې د ښځينه چارو د پرمختيا د څيړنيز مرکز مشري کوي:
دا وايي: ((زموږ په ټولنه کې بايد لوڼې واده کړی شي، دوی بل کور ته ځي او هلته بايد خسرخېلو ته پاملرنه وکړي، دا تر اوسه دود دی.
نو نجلۍ نن د يوې کورنۍ لپاره د يو دروند بار معنی لري. نو ځکه موږ په جوړښت کې بدلون ته اړتيا لرو، داسې تګلارو ته چې د دغه جوړښت چاره وکړي.))
په هند کې د شتمنۍ او پوهنې لوړېدا هم دغه عمل ته د پای ټکی نه دی ايښی، بلکې په واقعيت کې په سترو ښارونو کې ډېر دود دی.
څېړونکي يې دليل دا راوړي چې د پوهنې لوړوالی د دې لامل نه دی شوی چې خلک زامنو او لوڼو ته په يوه سترګه وګوري، بلکې عمومي پوهاوي د ماشوم د جنس غوره کولو تکنالوژۍ ته لاسرسی زيات کړی دی.
وروستي
~RS~a~RS~pashto~RS~q~RS~~RS~z~RS~50~RS~){kind=small}
bbc.co.uk navigation
د بي بي سي لينکونه
BBC © 2012 .بي بي سي د پرديو ويبپاڼو د مطالبو مسووليت نه اخلي
.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .