Tá clú agus cáil ar Andy Irvine mar cheoltóir aonair agus is geall le laoch é i saol cheol tíre na hÉireann. Bhunaigh sé Planxty le Christy Moore, Liam O’Flynn agus Donal Lunny, banna a bhí i gcroílár shaol an cheoil tíre in Éirinn agus thar lear sna seachtóidí. Chaith Andy tamall gear ag seinm le Dé Danann agus ansin dhírigh sé a aird ar an pháirtíocht rathúil a bhí aige le Paul Brady. Aithnítear a chuid ceoil ar fud na hÉireann mar gheall agus tá lorg a stíle le cluinstin ar a lán de na hamhránaithe óga in Éirinn. 

Tá an banna Ceilteach Boys of the Lough ag seinm, ag taisteal agus ag taifeadadh le chéile le caoga bliain. I measc bhaill an bhanna tá Dave Richardson, fear as Nortumbair a sheinneann an maindilín, an siotaran agus an cairdín; Cathal McConnell as Fear Manach, duine de na seinnteoirí is fearr ar an fheadóg stáin agus ar an fheadóg mhór sa traidisiún Éireannach, agus a dhéanann amhránaíocht fosta; Brendan Begley, Ciarraíoch a cheolann i nGaeilge agus a sheinneann ar an chairdín; Kevin Henderson ó Inse Shéaltainn ar an fhidil; agus Malcolm Stitt ó Gharbhchríocha na hAlban ar an ghiotár.

Is as Muineachán do Gráinne Duffy, ceoltóir atá i mbéal an phobail faoi láthair mar gheall ar a céad albam, ‘Out of the Dark’. I ndiaidh di céim a dhéanamh sa cheol chuaigh Gráinne ar an bhóthar ag déanamh seisiún ar fud na hIodáile agus na Fraince. Thabhaigh sí meas mór ón lucht critice mar gheall ar an stíl shainiúil racghormacha atá aici. D’éirigh go geal léi i rith an tsamhraidh ag Glastonbury, agus tá sí ar ais in Éirinn anois leis an ghreim atá aici ar thionsclaíocht an cheoil sa tír seo a dhaingniú!

Rugadh Marcas Ó Murchú i mBéal Feirste . Tá meas ag lucht an cheoil air le fada an lá mar gheall ar a fheabhas a sheinneann sé ar an fheadóg mhór, agus is minic a iarrtar air ceardlanna agus ranganna príobháideacha a thabhairt i nDoire, mar a bhfuil sé ina chónaí anois. Is fear ildánach é Marcas: tá sé i mbun Roinn na Spáinnise i gColáiste Choilm sa chathair sin, agus tá ardmheas air mar mhúinteoir Gaeilge fosta. Tá dhá albam eisithe aige; ‘Ó Bhéal go Béal’ i 1997 agus  ‘Turas Ceoil’ ar na mallaibh.