Sul y Cofio yng Nghymru

Sermoni Roedd seremoni wrth y Gofeb Genedlaethol yng Nghaerdydd ddydd Sul

Straeon Perthnasol

Mae digwyddiadau wedi eu cynnal ledled Cymru i gofio am filwyr sydd wedi marw ym mhob rhyfel ers y Rhyfel Byd Cyntaf.

Mae'r seremonïau yn coffau milwyr y gorffennol, a'r rheiny sy'n gwasanaethu'r wlad ar hyn o bryd.

Mae llong yr HMS Severn wedi teithio i Gasnewydd, lle bydd y criw yn rhan o'r seremoni cofio.

Dywedodd y prif weinidog ei fod yn bwysig cofio gwasanaeth ac ymroddiad y lluoedd arfog.

HMS Severn
Seremoni Wrecsam Roedd seremoni i gofio am rheiny fu farw wrth y gofeb yn Wrecsam

Mae'r HMS Severn, sydd â chyswllt a Chasnewydd, wedi teithio i'r ddinas i gymryd rhan mewn nifer o ddigwyddiadau ac ymweliadau.

Mae plant o ysgolion lleol wedi cael y cyfle i weld y llong, tra bod gwahoddedigion wedi bod mewn arddangosiad nos Sadwrn.

Dydd Sul, roedd y criw yn rhan o'r Gwasanaeth Sul y Cofio aeth ar orymdaith drwy'r ddinas at y senotaff.

Dywedodd yr Is-gomander Tim Berry: "Mae gennym ni berthynas agos gyda Chasnewydd ac mae'n fraint cael y gefnogaeth a'r croeso sy'n ein disgwyl yn y ddinas bob tro."

Yng Nghaerdydd roedd cynrychiolwyr o'r lluoedd arfog yn gorymdeithio i'r gofeb yng Ngerddi Alexandra ym Mharc Cathays, lle cafodd seremoni ei gynnal.

Roedd cyn filwyr yn bresennol i glywed Band a Chorfflu Drymiau Catrawd Brenhinol Cymru yn chwarae, cyn i fiwglwr ganu'r caniad olaf.

HMS Severn Bydd criw yr HMS Severn yn rhan o'r cofio yng Nghasnewydd

Yna clywodd y dorf gwn o Gatrawd 104 y Magnelwyr Brenhinol, Casnewydd yn tanio i ddechrau dwy funud o dawelwch.

'Saib i gofio'

Cafodd torch ei osod wrth y gofeb gan y Prif Weinidog, Carwyn Jones.

"Mae Sul y Cofio'n gyfle i bawb ohonom ystyried gwasanaeth, ymrwymiad ac ymroddiad ein lluoedd arfog," meddai.

"Mae'n bwysig iawn ein bod yn cymryd saib am ddwy funud o'n diwrnod heddiw i gofio am yr aberth a wnaed gan bobl gyffredin Cymru ar ein rhan dros y blynyddoedd.

Start Quote

Mae Sul y Cofio'n gyfle i bawb ohonom ystyried gwasanaeth, ymrwymiad ac ymroddiad ein lluoedd arfog”

End Quote Carwyn Jones Prif Weinidog

"Y flwyddyn nesaf byddwn yn nodi can mlynedd ers dechrau'r Rhyfel Byd Cyntaf, pan gollwyd miliynau o fywydau ifanc.

"Mae gennym raglen o ddigwyddiadau ar y gweill yng Nghymru i goffáu hyn.

"Mae'n bwysig ein bod yn trosglwyddo'r hanes hwn i genedlaethau'r dyfodol, fel na fydd eu haberth yn mynd yn angof."

Roedd nifer o seremonïau eraill, gan gynnwys un wrth gofeb y Ffiwsilwyr Brenhinol Cymreig ym Modhyfryd, Wrecsam, ac roedd Ysgrifennydd Cymru, David Jones yn y brif seremoni yn Whitehall, Llundain.

Dywedodd ei fod yn fraint cael cynrychioli Cymru yn y digwyddiad.

"Ar Sul y Cofio rydym yn sefyll gyda'n gilydd fel gwlad i gofio dewrder ac ymrwymiad ein dynion a merched mewn rhyfeloedd dros y byd."

Mwy Am y Stori Hon

Straeon Perthnasol

Dyw'r BBC ddim yn gyfrifol am safleoedd rhyngrwyd allanol.

Gwleidyddiaeth

Pigion

Help / Cymorth

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.